Reportajen David da Costa
Provedór Direitos umanos e Justisa, (PDHJ) konsidera, idade la bele sai tan razaun atu fó indultu ba eis padre Richard Daschbach, tanba Tribunal uza tiha ona konsiderasaun ne’e hodi hatun nia pena husi tinan 30 ba tinan 12. Tanba pedofilia ne’e krime grave no to’o agora Daschbach seidauk rekonhese nia sala, arrepende ka husu deskulpa ba vítima sira.
Provedór Direitos umanos e Justisa, (PDHJ), Virgílio da Silva Guterres “Lamukan”, governu tinan-tinan naran eis padre Richard Daschbach, sempre iha lista indultu, maibé loloos ne’e kazu hanesan pedofilia laiha razaun atu fó indultu, tanba ida ne’e kazu krime ne’ebe grave.
“Entaun ami dehan laiha razaun atu fó indultu ba ema pedofilia, tanba pedofilia la’os krime baibain, ne’e krime ne’ebe grave,” dehan Provedór “Lamukan”, ba jornalista sira iha Exelsior Resort, Pantai kelapa, Sexta 15/05.
Nia haktuir, iha tinan kotuk, bainhira eis padre Richard Daschbach naran tama lista indultu, PDHJ ba hasoru malu ho Prezidente informalmente no fó hanoin katak provedór laiha kompetensia atu halo intervensaun iha dezisaun prezidente nian.
Maibé iha momentu ne’e PDHJ akonsela prezidente, se bele prezidente rona hanoin husi vitima ka reprezentante vitima ninia. Apresia teb-tebes tanba iha tinan kotuk Prezidente fó espasu atu rona hanoin vitima, ne’ebe ikus mai enkoraja Prezidente atu la fó indultu.
Nia dehan, agora tinan ida ne’e Richard Daschbach naran mosu tan fali iha lista indultu, tanba ne’e, husi parte provedór laiha razaun moral atu fó indultu ba Richard Daschbach, tanba to’o agora nia seidauk rekoinese nia sala, nia sei dauk arrepende, nia seidauk husu desklupa ba vitima sira.
Nia salineta, se nia husu deskulpa no arrepende ona nia sala, kestaun seluk bele sai razaun ba prezidente, mas to’o agora nia la husu desklupa, ema balun dehan tanba nia katuas ona, nia idade ona entaun prezidente fó indultu ho razaun ida hanesan ne’e.
Maibé atu hatete Tribunal lolos fó pena ne’ebe liu tinan 12, dala ruma bele to’o 30 anos tanba krime ne’e grave. Maibé tribunal hatun tiha pena ne’e mai 12 anos tanba razaun nia katuas ona, nia idade ona entaun fó de’it 12 anos.
Ne’ebe razaun ida katuas ne’e labele ona uza atu fó indultu, tenke iha razaun seluk, tanba razaun ida nia katuas ne’e, Tribunal uza tiha ona atu hatun ninia pena husi tinan 30 mai iha tinan 12 ona.
Tanba ne’e labele uza razaun ne’e, maibé bele uza razaun seluk, nia tenke arrepende ho nia hahalok ne’e, husu deskulpa ba vitima sira.
“Ha’u fó hanoin ba Prezidente atu rona vitima sira nia hanoin, atu nune’e, ita labele fó prezedente ne’ebe ladi’ak, ida ne’e hakanek vitima sira,” nia dehan.
Nia subliña, tanba indultu ne’e buat ida karik estadu atu fo deskulpa ida ba eis padre Richard Daschbach, maibé problema eis padre la husu deskulpa ba vitima sira, se nia husu desklupa, estadu mos bele husu desklupa ba nia.
“Ita bele perdua malu ita kuandu husu desklupa, ba hau fó perdaun. Mas se diskulpa laiha, ita la konfesa ita nia sala, oinsa mak ita bele fo perdaun,” nia afirma.
Tanba ne’e maka Provedór Direitos umanos e Justisa la konkorda inistativa fó indultu ba ba eis padre, fo indultu ba eis padre ne’e hanesan insulta vitima sira.
Tribunál Oecusse Kondena Richard Daschbach Kadeia Tinan 12
Antes ne’e, Tribunál Distritál Oecusse (TDO), liu hosi desizaun finál, iha fulan Dezembru tinan 2021, kondena eis Padre Richard Dasbach, tenke kumpre kadeia tinan 12, tanba nia involvimentu ba krime abuzu sexuál menór no pornografia infantíl, tuir prosesu iha loron 07 fulan-Setembru 2020, prosesu NUC 0022/19.PGGCC.
Akuzasaun ne’ebé Tribunál fó ba eis Padre Richard Dasbach hosi Estadus Unidus Amérika (EUA), hamutuk tinan 30, bazeia ba leitura akordaun hosi Juiz Yudit Pamungkas, maibé ikusmai deside kadeia tinan 12, tanba haree mós ba idade inklui kondisaun fíziku hosi lezadu.
