Reportajen David da Costa
Prezidente Parlamentu Nasionál, krítika frakeza iha prosesu investigasaun no evidénsia iha kazu scam call center ne’ebé envolve sidadaun xineza sira iha Timor-Leste. Tanba Parlamentu bele de’it halo kontrolu polítiku, maibé desizaun kona-ba libertasaun suspeitu sira mak kompeténsia Tribunál no se evidénsia no investigasaun la forte, ne’e bele afeta rezultadu prosesu justisa.
Prezidente Parlamentu Nasionál (PPN) Maria Fernanda Lay, haktuir katak kazu sidadaun xineza sira ne’ebé envolve iha atividade scam call center iha Timor-Leste hetan ona atensaun husi Parlamentu Nasionál, no membru parlamentu balun fó tiha ona krítika kona-ba prosesu ne’ebé hala’o husi órgaun kompetente sira.
“Parlamentu Nasionál sira krítika, mais prosesu iha ita nia orgaun kontrolu. Faktus hotu lori to’o Tribunál, Tribunál mak relis sira, ne’ebé agora atu halo nusa,” dehan Maria Fernanda Lay ba jornalista sira iha Palásiu Prezidensia Bairo-Pite, Segunda 13/07.
Maria Fernanda Lay hatete, Parlamentu de’it halo kontrolu polítiku no públiku, maibé prosesu investigasaun no aplikasaun lei iha responsabilidade husi órgaun kontrolu no justisa. Faktu hotu-hotu ne’ebé relasiona ho kazu refere tenke lori ba Tribunál atu deside tuir lei.
Nia mós dehan katak desizaun atu hasai ka libera suspeitu sira husi detensaun mak kompeténsia Tribunál. Bainhira iha dúvida kona-ba tanbasá suspeitu sira bele sai, presiza husu diretamente ba Tribunál, tanba Parlamentu la iha kompeténsia atu esplika desizaun judisiál ne’e.
“Ita boot ba husu Tribunál tanbasá mak husik sira sai, evidensia mak la forte, investigasaun mak la forte, ha’u la hatene,” Lay dehan.
Tanba Timor-Leste nu’udar Estadu demokrátiku ne’ebé fó espasu ba kontrolu públiku no respeita independénsia órgaun soberania sira, inklui sistema judisiál iha prosesu atu fó justisa tuir lei.
