Reportajen David da Costa Gusmao
Iha loron aniversáriu Centro Nasionál Chega! (CNC) ba dala-16, Xefe Kasa Sivíl Prezidénsia Repúblika, Francisco Vasconcelos hatete Estadu Timor no povu presiza kontinua prezerva istória Timor-Leste, tanba ida ne’e mak riku soin nasaun nian.
“Rekonsiliasaun ne’e importante ba ita, ne’e ita presiza husu, rkonsilasaun ne’e mak objetivu ga? Rekonsilasaun ne’e dalan, se rekonsilia ne’e mak objetivu mak buat lubuk ida mak ita to’o ona, mas objetivu ita nia mak atu moris iha pás, entaun rekonsiliasaun hanesan dalan, esforsu barak ita sei presiza hela,” Xefe Kasa Sivíl dehan, bainhira halo nia diskursu iha ámbitu komemorasaun aniversáriu CNC ba dala-16, iha Balide, Kinta 28/10.
Ho ida ne’e, presiza tau matan ba vítima sira, no ba povu tomak, atu nune’e pás ne’e iha duni rai Timor-Leste ida ne’e, ho pás ida ne’e bele iha dezenvolvimentu ne’ebé maka lao diak.
“Nune’e, Estadu no vitima, ita povu Timor-Leste laran tomak presiza preserva duni istoria ida ne’e, tanba ida ne’e riku soin boot ne’ebé mak ita nia iha. Istória moruk ne’e hanorin mai ita para ita labele repete tan,” nia dehan.
Tanba ne’e mak Chega dehan para ho troturasaun, para ho violasaun, para ho bosok, para ho halo susar ema, “laos deit mak halo susar ita Timor, maibe ita mós labele halo susar ba ema seluk, tanba ita hanesan umanu”.
“Iha ohin kalan ida ne’e hau lori prezidente nia naran, hato’o parabéns ba Centro Nasionál Chega (CNC) ne’ebé ohin halo tinan ba dala-XVI. Nune’e mós ba parseira husi rai liur no rai laran sira, ita boot nia kontribuisaun hanesan esforsu atu lori pás no hametin nafatin memória ne’ebé mak moruk, maibe fó korajen atu ita bele moris dignu liu hanesan ho estadu ida,” nia hakotu.
