Reportajen Joselina dos Santos
Traballadór Ana Rosalia da Silva sente kontente tebes tanba bele hetan oportunidade ba iha Programa Mão de Obra nian, tanba nia maluk mane sira bele fo fiar ba feto, hodi bele involve-an, halao serbisu hodi hatudu katak feto bele hala’o serbisu ne’ebe nia bele halo.
“Programa ne’e, iha benefisiu boot tanba ami bele hetan netik osan husi programa ne’e, hodi selu oan sira nia eskola no mos ba nesesidade uma laran,” dehan traballadora Ana Rosália ba Neon Metin iha aldeia Caetarau, Suku Loi-Lubo, Postu-Administrativu Vemasse Munisipiu Baucau, 6/12.
Traballador ne’e, rekomenda ba parte relevante karik bele ba oin programa ida ne’e kontinua nafatin no aumenta tempu, tanba durasaun fulan ida de’it, nune maluk sira seluk ne’ebe seidauk hetan ne’e bele hetan fali oportunidade hotu.
Iha sorin Seluk, Xefe Aledia Caetaranu, Pascoal de Souza Correia hateten Suku Loi-Lubo Iha Aldeia tolu maibé bainhira atu implementa, kada aldeia iha ninia proposta ne’ebe la hanesan. Aldeia Caetaranau iha proposta mak atu hamoos estrada no valeta, aldeia Nuno-Ti kona-ba Kuda ai-horis, no Aldeia Uai-Dau kona-ba estrada atu ba semitériu.
Autoridade ne’e hatutan, iha altura ne’e Xefe suku husi Suku 7 Iha Postu-Administrativu Vemasi hamutuk ho lia-na’in sira halo votasaun ba proposta hirak ne’e, nune iha suku Loi-Lubo, aldeia Caetaranu mak liu tanba tuir matadalan, nune aldeia 2 labele tanba tempu limitadu.
“Traballadór hirak ne’e, kada grupu ema nain 20 tenke tuir igualdade jéneru mane nain 10, feto nian 10. Iha ne’e ami grupu 4, mak hanesan grupu aldeia Caetaranu, Nuno-Ti, Uai-Dau no grupu Juventude. Tanba nia implementasaun ne’e limitadu to’o fulan 1 de’it labele liu fulan ida, entaun grupu 4 ne’e kada grupu semana ida,” hateten Xefe Aldeia.
Traballador sira ne’e iha mos ema defisiénsia, tanba programa mão de obra ne’e atu ajuda maluk kbiit la’ek sira, nune’e sira bele atende ba sira nia nesesidade lor-loron. kona-ba orsamentu Xefe ekipa kada loron 1 hetan $7.00 no traballador bain-bain hetan kada loron hetan $5.00.
Iha fatin hanesan, Ofisiál Governu Lokál (OGL), Postu-Administrativu Vemasi, Liborio A. dos Santos hateten programa Mão de Obra Postu Administrativu (PMOPA), atividade ida ne’ebé governu kria atu tulun komunidade liu-liu ba ema kbi’it laek sira. Tanba durante Pandemia ovid-19 nia laran ema barak mak la serbisu no la fa’an sasán, tanba ne’e governu kria atividade ida ne’e, atu ema bele serbisu bele hetan kustu hodi bele muda sira nia ekonomia uma laran.
