Reportajen David da Costa
Parlamentu Nasionál (PN) aprova ona Projetu Proposta Lei (PPL) no.23/VI (3a) kona-bá Orsamentu Jerál Estadu (OJE) tinan fiskál 2026 iha debate faze jeneralidade loron da-toluk nian parte lorokraik, ho votus a favór 42, abstensaun 23 no kontra 0,
Iha komunikadu ofisiál ne’ebe maka neon metin asesu ohin husi Gabinete Primeiru Ministru, hafoin votasaun ba OJE tinan 2026, Prezidente Parlamentu Nasionál (PPNL), Maria Fernanda Lay deklara ofisialmente katak, Orsamentu Jerál Estadu tinan 2026 pasa ona.
Iha komunikadu Imprensa ne’e, Primeiru-Ministru (PM), Kay Rala Xanana Gusmão agradese bá deputadu sira iha Parlamentu Nasionál ne’ebé partisipa ativu iha prosesu diskusaun ne’e no Governu konsidera nafatin hanoin di’ak sira hosi bankada opozisaun sira
“Ha’u atu dehan de’it Governu konsidera hanoin sira ne’ebé kapas, furak no intelejente mai hosi bankada opozisaun. Ami sei buka aprende nafatin ho ita-l boot sira nia sabedoria. Maibé, laiha ona tempu atu halo fali OJE foun ida tuir ita boot sira nia hanoin, programa, vizaun no estratéjika. Ne’ebé, ami kala husu de’it katak ita komprende malu bá, husik ami estraga nafatin povu nia moris bá hodi ita bele la’o to’o povu mak sei julga ita,” dehan Primeiru Ministru (PM) Kay Rala Xanana Gusmão iha komunikadu Imprensa, bainhira halo aprezentasaun ba proposta Lei Orsamentu Geral Estadu ba tinan 2026 iha Jeneralidade, iha Parlamentu Nasionál (PN), Sexta 07/11.
Iha Proposta Lei OJE 2026 Billiaun $2.214.689,195 ho kategoria saláriu no vensimentu $476.870.249, bens no servisu korrente $447.904.446, transferénsia públika $820.710.160, kapitál menór $32.556.96 no kapitál dezenvolvimentu $436.647.379.
Sesaun Plenária ne’e, prezide hosi Prezidente Parlamentu Nasionál, Maria Fernanda Lay, akompaña hosi Membru Meza sira, prezente mós membru Governu sira ho entidade relevante sira.
Tuir kaléndáriu apresiasaun proposta Lei OJE 2026, debate no votasaun espesialidade no votasaun finál globál sei hala’o iha 13-26 Novembru 2025.
