Reportajen Adroaldo ‘Saretukau’
Komunidade afetadu ba sidade universitáriu uma-kain 31, oferese rai mamuk 66 hektare iha Mausado ho gratuita ba Minitériu Ensinu Superior Siénsia no Kultura (MESSK), hodi harii sidade universitáriu maibé governu ho autoridade lokal la aseita ho komunidade afetadu sira nia desizaun.
Maibé komunidade sira mantein sira nia pozisaun hodi la fo sira nia rai tanba konsidera nu’udar rai eransa no produtivu ne’ebé sira uza desde viz avó to’o ohin loron ba sira nia moris lor-loron.
“Governu atu foti ne’e, ami oferese rai seluk. Ami nia rai ida ne’e fila ba rai agrikultura ho rai kultura, tinan-tinan atu iha anu novu mai foti hahan iha ne’e hosi sa’e ba uma knua, ida ne’e ami labele fo”, hatete António ba Neon Metin.
“Ami la simu tanba iha Aileu ne’e rai tetuk mak ida ne’e de’it ona, ami iha foho mak barak. Fo osan mos ami la simu tanba ami uza rai ne’e mak hodi han hemu, hodi selu ami nia oan sira eskola”, tenik Nia.
António hatete rai ne’ebé sira hela nu’udar eransa hosi avó, nune’e sira oferese rai seluk ho gratuita ba governu, atur bele harii sidade universitáriu ne’e.
“Governu atu foti ne’e, ami oferese rai seluk. Ami nia rai ida ne’e fila ba rai agrikultura ho rai kultura, tinan-tinan atu iha anu novu mai foti hahan iha ne’e hosi sa’e ba uma knua, ida ne’e ami labele fo. Fatin seluk ne’ebé ami oferese hodi loke eskola mak rai ida naran Mausado ni-nia luan ne’e iha 66 hektare, ida ne’e ami oferese gratis de’it, la husu sentavus ida”, António hatete ba Neon Metin.
Komunidade sira sira dehan, la’os la simu dezenvolvimentu maibé sira husu, tanba sa mak tenki hili sira nia rai produtivu, enkuantu rai mamuk barak ne’ebé bele uza ba harii sidade universitáriu ne’e. Komunidade sira hatutan katak karik la iha solusaun, dalan ikus mak tuir dalan justisa ba tribunal.
Iha parte sorin komunidade ne’ebé aseita sai hodi simu indimnizasaun, José Maria Tilman ba Neon Metin katak hakarak sai hosi sira nia fatin hodi oferese ba estadu hodi harii sidade universitáriu ne’e tanba di’ak ba Aileu no ba Timor-Leste, liu-liu joven sira aban bairua. Oras ne’e família refere simu ona valor indimizasaun ho montante osan ho valor 40,000 mil.
“Se ami mak fa’an karik ami lakon boot, maibé ami mai ona ho prinsípiu ida katak haree liu valor sustentabilidade ba Munisípiu no nasaun boot liu, ne’e hanesan ami halo sakrifísiu”, dehan Maria
Iha parte sorin, konabá fatin ne’ebé komunidade sujere hodi harii sidade universitáriu, Xefe Suku Bandudato José M. Mouzinho hatete, fatin refere dook hosi vila ka sidade, tanba ne’e deside hodi harii iha suku Bandudato no Lau-usi.
“Dezenvolvimentu ne’e harii hosi sidade mak ba ka, hosi kotuk mak mai, wainhira ita harii tiha iha kotuk, ita ne’e hanesan lutu, sirkula ona ita, ita nia animal sira husik ba ne’ebé, sedangkan sidade ida ne’e oin mai”, hatete líder komunitáriu ne’e.
Entretantu rai ne’ebé deside ba konstrusaun nian, Diretor Jeral Administrasaun no Finansas MESSK, Hernani Vitervo da Costa Soares hatete desizaun governu nian ho autoridade Munisípiu mak deside tuir aprezentasaun hosi autoridade nian ne’ebé propoin fatin tolu hanesan Hundolte, Seloi Kraik no Bandudato, “ne’e desizaun governu nian tanba fo fatin tolu ami atu hili, ministériu hili ida ne’e”. Hernani hatete.
