Home Notisia Uma Kain 31 La Aseita Ho Lansamentu Sidade Universitáriu Tanba Harii Iha...

Uma Kain 31 La Aseita Ho Lansamentu Sidade Universitáriu Tanba Harii Iha Rai Produtivu

1270
0
Lansamentu fatuk dahuluk harii sidade universitariu iha Aileu. [Foto: Adroaldo | 21.12.2021]

Reportajen Adroaldo ‘Saretukau’

Ministériu Ensinu Superior Siénsia no Kultura (MESSK) lansa fatuk dahuluk ba projetu sidade universitáriu iha loron 21 Dezembru 2021, ne’ebé sei harii iha Suku Bandudato no Lau-usi, Postu Administrativu Aileu Vila, Munisípiu Aileu.

Ba lansamentu ne’e komunidade uma kain 31 ho total ema 144,  la aseitano la fó sira nia rai ba MESSK hodi utiliza ba konstroi sidade universitáriu, ho razaun rai ne’ebé sira hela nu’udar rai eransa no rai produtivu ne’ebé sustenta sira no sira nia oan durante tinan naruk nia laran.

Komunidade sira haktuir katak, bainhira sira sai hosi fatin refere, sira sei ba hela iha ne’ebé no fatin ne’ebé sira atu muda ba iha kondisaun di’ak hanesan sira hela da-dauk ne’e ka lae?

Tanba ne’e tuir komunidade afetadu ba sidade universitáriu ne’e, Fatima Xavier hosi Suku Bandudato hatete katak sira sei la sai hosi sira nia fatin tanba ne’e nu’udar rai eransa no sei rai ba oan nia futuru.

“Governu hasai sei labele karik, tanba ami moris iha ne’e kleur ona hosi ami mai avó tutan ba tutan to’o mai ami, pois agora ami sei rai ba ami nia oan sira, ami sei labele sai hosi fatin ida ne’e tanba fatin ne’e sai hanesan rai produtivu ba ami nia moris nu’udar ema agrikultor, nia mak sai nu’udar inan ida ne’ebé fo han ami loron kalan” hatete Fatima iha Suku Bandudato, 20/12.

Nia hatete fatin ne’ebé sira hela ba nu’udar uma fatin inklui to’os sira, aktividade ne’ebé sira halo mak atividade agríkola hanesan kuda modo, batar, talas, ai-fatina no seluk tan ne’ebé sustenta sira nia moris no fa’an hodi haruka oan sira ba eskola, “ami han balu, balu fa’an hodi selu fali alin sira ba eskola”, nia hatete.

Fatima hatete katak sira hetan ona informasaun hosi governu atu sai, maibé sira sei la sai no lakoi indemnizasaun, sira hakarak mak sira nia rai rasik, “tanba ida ne’e mak ita nia moris duni, ita sai hosi ne’e ita ba hetan fali fatin ida di’ak hanesan ne’e iha ka lae? Ne’e la iha, ita foho tiha ona atu hakat tan ba foho ida ne’ebé”, tenik Nia.

Fatima haktuir sira la’os lakoi dezenvolvimentu iha sira nia rai, maibé sira fo fatin seluk ne’ebé la produtivu ba governu hodi harii sidade universitáriu ne’e maibé governu hakarak fali sira nia rai ne’ebé produtivu, tanba ne’e mak sira la simu ho desizaun governu nian.

Konabá liña kordenasaun entre komunidade afetadu ho autoridade, vítima hosi konstrusaun sidade universitáriu ne’e hatete hosi kedas nível munisipal to líder lokal la iha konfirmasaun ho sira antes atu deside ba projetunida ne’e.

“Sira nunka halo kordenasaun ho ami ida, primeiru sira hosi Munisípiu mak tun lansung mai, autoridade lokal atu marka enkontru dala ida ho ami mos nunka, to’o agora sira nunka besik ami”, nia hatete.

Nia haktuir katak enkontru sira, autoridade lokal bolu de’it komunidade sira ne’ebé mak a favor ka aseita ba konstrusaun refere, maibé ba sira lae. Fatima haforsa katak bainhira governu obriga sira sai mak sira nia desizaun ikus lori ba tribunal hodi buka justisa ne’ebé los.

Iha fatin hanesan inan faluk Maria Ilibere nu’udar komunidade afetadu hatete, “ami nia rai hanesan rai kultura, ne’e ami moris ho ida ne’e, ami sei la fo, hanesan kadernu no lapis hotu mak ida ne’e, ne’e mak governu foti ami han hodi saída, ne’ebé ami sei la fo”.

Nia hatete katak líder komunitáriu sira la ko’alia ho sira konabá atu foti kondisaun sira antes hola desizaun maibé ida ne’e hanesan obriga fali atu foti sira nia rai, “ami nia moris mak ida ne’e, nusa mak foti ami nia rai tomak de’it, ne’ebé sira hakarak mak foti de’it, sira nia lia-fuan mak ida foti ne’e”, nia dehan.

Nune’e mos komunidade afetadu António Xavier Perreira hatete rai ne’ebé sira hela nu’udar eransa hosi sira avó, sira nia inan-aman to’o sira ohin loron tanba ne’e sira sei la sai.

“Governu atu foti ne’e, ami oferese rai seluk. Ami nia rai ida ne’e fila ba rai agrikultura ho rai kultura, tinan-tinan atu iha anu novu mai foti hahan iha ne’e hosi sa’e ba uma knua, ida ne’e ami labele fo. Fatin seluk ne’ebé ami oferese hodi loke eskola mak rai ida naran Mausado ni-nia luan ne’e iha 66 hektare, ida ne’e ami oferese gratis de’it, la husu sentavus ida”, António hatete ba Neon Metin.

Nia hatutan katak sira komunidade uma-kain 31 ho total ema 144 la aseita hodi harii sidade universitáriu iha sira nia rai, “ami uma-kain 44, sira konta ami hela uma-kain 9 mak la hatan, sira hetan uma-kain 35 mak simu indimizasaun”, António klarifika ba Neon Metin katak líder komunitáriu sira fo informasaun laloos ba iha nível Nasional katak sira aseita hotu.

Ho informasaun ne’ebé Neon Metin hetan hosi komunidade sira ne’ebé la aseita, Xefe Suku Bandudato José M. Mouzinho hatete, hahú tinan 2019 líder komunitáriu sira halo diálogu ho komunidade sira antes to’o lansamentu primeira pedra ba sidade universitáriu ne’e.

“Hotu-hotu aseita, iha balu mak la aseita, la hatene sira nia la asieta ne’e ho razaun saída, sira nia hakarak mak saída, dezenvolvimentu mak la monu ba sira nia laran karik, ne’e mak ha’u labele hatene, maibé maioria mak hakarak” Nia hatete iha lansamentu fatuk dahuluk ba sidade universitáriu iha Suku Bandudato, 21/12.

Xefe Aldeia hatete hosi uma-kain 44, uma-kain ualu mak la aseita, nia hatutan durante ne’e nia halo aprosimasaun ba komunidade, liu hosi nia Xefe Aldeia sira maibé komunidade balu tuir, balu lae ho razaun sira la aseita.

Líder komunitáriu ne’e hatete, espasu ne’ebé utiliza ba konstrusaun sidade universitáriu ne’e ho total 29 hektare, ne’ebé pertense ba Suku Bandudato, Lau-usi no Aldeia Sarin, iha ne’ebé komunidade uma-kain 44 mak sei hasai ka muda ba fatin seluk bainhira konstrusaun hahú.

“Komunidade Suku rua, Aldeia ida sira to’os mak tama hotu iha área ida afetadu ne’e”, nia hatete.

Iha parte sorin, Neon Metin halo konfirmasaun ho Diretór Jerál Administrasaun no Finansas MESSK, Hernani Vitervo da Costa Soares, konabá uma-kain 31 la aseita ba konstrusaun sidade universitáriu, nia hatete katak iha uma-kain 9 de’it mak la aseita ka la tama lista tuir dadus levantamentu ne’ebé sira halo.

Konabá rai konstrusaun nian, Diretór ne’e hatete desizaun governu nian ho autoridade Munisípiu mak deside tuir aprezentasaun hosi autoridade nian ne’ebé propoin fatin tolu hanesan Hundolte, Seloi Kraik no Bandudato, “ne’e desizaun governu nian tanba fo fatin tolu ami atu hili, ministériu hili ida ne’e”. Hernani hatete.

Print Friendly, PDF & Email

LEAVE A REPLY

Please enter your comment!
Please enter your name here