Reportajen Santina Lucia da Costa
Organizasaun Filiadas da FRETILIN (OFILIN), fo apoiu total ba Dr. Francisco Guterres Lú Olo hodi re-kandidata-an, ba eleisaun Prezidensial Repúblika periodu 2022-2027, tanba tuir OFILIN Lú Olo hatudu nia neon badinas, no neon brani atu hasees rai ida ne’e husi krize oi-oin liu-liu kombate korrupsaun.
Iha konferensia imprensa, Porta-Voz Frandix Hisman hateten OFILIN nu’udar Organizasaun Filiadas Partidu Frente Revolusionária do Timor-Leste Indepedente /FRETILIN, hakarak hato’o ba Kuadru OFILIN husi nivel Nasional, Sub-Nasional to’o baze no ba Povo Doben katak, OFILIN respeita KANDIDATU hot-hotu nia vontade politika manifesta iha lansamentu apresentasaun kandidatura hirak ne’e, nu’udar vontade Timor-Oan hotu nian.
“OFILIN sempre iha nia Pozisaun rasik hodi apoiu destino Nasaun no Estadu liu husi apoia ne’ebé responsivel fó ba Kandidatu ba Presidente da Repúblika Periodu 2022-2027, ne’ebé mós hatudu nia neon badinas no neon brani atu hakses rai ida ne’e husi krize oi-oin no liu-liu, kombate Korupsaun.” Hateten, Porta-Voz OFILIN, Frandix Hisman liuhusi Konferensia Imprensa iha Sekretariadu OFILIN, Luz-Clarita, 26/1.
OFILIN apresia no respeita timoroan hotu ne’ebé iha vontade tuir legitimidade demokrátika, hodi kandidata an ba Presidente da Repúblika ba periodu 2022-2027.
OFILIN totalmente fo apoia ba Presidente ne’ebé hatuur Misaun Xefe Estadu ho lolos tuir espiritu no letra ne’ebe hatur iha artigo 74° Constituição da Republica Democratica deTimor-Leste nian, OFILIN apoia Prezidente ida ne’ ebé iha nia desizaun politika demokratika rasik, tuir los Constituição da Republica Democratica de Timor-Leste nian no sei la halo tuir Ordem Informal ruma.
OFILIN apoia Kandidatu ida ne’ebé Kumpri regras Administrativas no rekezitus fomais legais sira no Juridikamente elejivel nu’udar Kandidatu ba Presidente da Repúblika, OFILIN apoia kandidatura ida ne’ebé lha kredibilidade no Integridade Di’ak no Iha Komitmentu forte no Kontra Korupsaun Iha Timor-Leste durante nia mandato.
“OFILIN apoia Kandidatura ida ne’ebé mai husi Partidu FRETILIN no OFILIN kumpri desizaun diretiva Partidu FRETILIN nian hodi hatuur Etika Politika ida Honesto no Seriedade, tuir konviksaun Politika OFILIN nian rasik.” Dehan, Porta-Voz, OFILIN.
Nune’e OFILIN apela ba estrutura tomak OFILIN nian husi Nasional to’o ba Sub-Nasional no Baze atu mobiliza rekursus tomak Organizasaun nian hodi apoia total no Kompleta ba Kandidatura Dr. Francisco Guterres Lú Olo iha loron eleisaun ne’ebe tuir Kalendario STAE nian sei hala’o iha 19 de Marsu 2022.
No mós apela ba membru sira atu assegura nafatin paz, estabilidade no seguransa iha ita ida-idak nia hela fatin, nu’udar responsabilidade no jestu ne’ebe a’as, hodi garante ba realizasaun eleisaun prezidensiál.
