Reportajen David da Costa Gusmao
Kandidatu indepedente ba Prezident Repúblika (PR) ba periodu 2022-2027, Felizberto Araújo Duarte, ohin ba rejista ona iha Tribunál Rekursu Dili, ho proponente apoiu hamutuk 7000 mil resin husi munisipiu 12 no inklui Rejiaun Administrativu Espesiál Oe-cusse Ambeno (RAEOA).
“Hau nia prezensa iha fatin ida ne’e, atu hato’o hau nia dokumentu atu bele aprezenta hau nia kandidatura ba Prezidente da Republika (RP) 2022-2027. Hau kontente tanba bele partisipa iha elisaun Pezidensiál agora ida ne’e, tanba hau haree katak hanesan jerasaun foun ne’ebé moris iha 1978, depois invasaun Indonesia, hau sente katak hau mós iha kapasidade natoon atu bele konkorre ba PR,” dehan kandidatura independente ne’e ba jornalista iha Tribunal Rekursu Dili, Kinta 27/01.
Nia dehan lista proponente apoiu ne’e iha 7.000 mil resin, husi munisipiu 12 inklui RAEOA, iha Dili por volta 2 mill resin, depois Ermera 1.000 mil resin, Baucau ho RAEOA 400 ida hanesan ne’e. Nune’e totál hotu husi munisipiu mais de 7.000 mil. Agora manan ka la manan ne’e povu mak deside, bainhira ba tuir vota hodi deside se mak sai Prezidente da Repúblika.
“Karta ami entrega ona, dokumentu no rekerimentu ne’ebe sira presiza por ezemplu hanesan kartaun Elitorál copy, tenke asina karta aseitasaun, kandidatura mós asina ona autentika ona, no mos reprezentante elitorál mos autentika, no aprezenta ona no dokumentu sira ne’e konklui ona. Hau entrega ona ba sekretariadu TR no agora ita hein hela sira atu hato’o informasaun fali mai karik falta buat ruma ita tenke kompleta fali. Mais hau konfia katak buat hotu laiha fallansu, tanba prepara tiha ona iha fulan rua, antes mai aprezenta iha ne’e,” nia esplika.
Nia espera katak iha elisaun Prezidensiál ida ne’e, bele kontribui ba pás no estabilidade “iha ita nia nasaun tanba ita hatene katak povu barak sei moris iha kiak no mukiit nia laran. Ita konkore ba prezidente para ita bele hato’o ita nia opiniaun ba programa ruma ne’ebé diak atu loron ruma mesmu ita ba ka ita laba mós karik ida ne’ebé konsege ba, bele rona katak iha opiniaun ruma ne’ebe diak iha futuru prezidente tenke rona”.
Tanba ida ne’e mak importante tebes para konkorre, hodi bele hato’o opiniaun ne’ebè diak no bele kontribui ba dezenvolve ba rai ida ne’e. No buat ne’ebe diak bele halo no kontribui ba sosiedade ida ne’ebé diak.
Kandidatu independente ne’e mai ho nia motto “Prezidente Intelektuál no Ekonomista. Tanba Prezidente tenke iha intelektuál atu interpreta problema nasaun nian, no ekonomista tanba problema kiak oinsa atu rezolve”
“Ita presiza prezidente ne’ebe mak iha kapasidade interpreta problema nasaun nian, no ekonomista tanba problema kiak, por ezemplu oinsa rezolve ema ne’ebe labele ba eskola, ita presiza hatene konseitu ekonómiku, ita presiza ideia ne’ebe buka oinsa solusiona liuhosi intervensaun ekonómika,”tenik nia.
