Reportajen Umbelina dos Reis
Vise Ministru Edukasaun Juventude No Desportu (MEJD), António Guterres ofisialmente halo lansamentu fatuk dahuluk ba programa reabilitasaun edukativu ba eskola 16 iha munisípiu Dilí, no ba Eskola Sekundáriu Tékniku Vokasional Teknolojia no Indústria (ESTVTI) Bekora, sei halo konstrusaun ba edifísiu, Perfurasaun bee no harii moru ho montante $145 mil.
Ba serimónia lansamentu iha Eskola Téknika Vokasionál (ESTVTI) Becora, Vise Ministru Edukasaun Juventude No Desportu, António Guterres hatete, liu husi programa konstrusaun reabilitasaun infraestrutura edukativu ho Orsamentu Jeral Estadu (OJE) 2021, nune’e iha Munisípiu Díli benefisiáriu hamutuk eskola 16. Projetu komunitáriu ne’e sei kontribui husi grupu kumunitáriu MEJD nian no garante tinan ida tenki finaliza konstrusaun refere.
“Lansamentu fatuk dahuluk projetu komunitáriu ne’ebé prevé iha Orsamentu Jerál Estadu 2021 nian. Iha Díli benefisiáriu hamutuk eskola 16 no hahú ona, depois eskola sira seluk komesa da-dauk tanba levantamentu fundu hamutuk 25% ne’e agora iha hotu eskola, ita garantia fin du anu eskola ne’ebé hala’o ne’e remata ona,” Dehan Vise Ministru MEJD António Guterres ba Jornalista sira iha ámbitu lansamentu fatuk dahuluk iha Becora, 08/02.
Governante ne’e afirma eskola tékniku vokasional ESTVTI, Becora tenki iha moru no fazeadamente ita hala’o konstrusaun rehabilitasaun edifisiu, perfurasaun bee mos no konstrusaun moru ho orasamentu $145 mil.
“OJE 2021 Ministériu Edukasaun fo prioridade máksimu liu ba infraestrutura ho montante $111 mil i tal ho pursentu 60%, aloka ba infranstrutura ne’ebé nia prosesu la’o ho tipu karakterístika haat (4) mak hanesan projetu komunitáriu, kapital dezenvolvimentu, fundu infranstrutura no bens servisu,” nia akresenta.
Nia relata, projetu komunitáriu tinan kotuk por volta 204 eskola iha prosesu verifikasaun, hela 202 eskola mak avansa ba asina akordu ho 656 sala aula ida ne’e ba iha projetu komunitáriu, husi kapital dezenvolvimentu 22 eskola, fundu infrastrutura iha eskola 4 no bens servisu eskola 1, ida ne’e mak tau iha orsamentu OJE 2021.
Entretantu iha nível nasional benefisiáriu hamutuk 202 eskola por volta 656 sala de aula iha teritóriu Timor-Leste liu husi programa konstrusaun reabilittasaun infraestrutura edukativu iha OJE 2021 prevé $143.567.56, hodi halo servisu hirak ne’ebé estabelese ona iha MEJD.
