Reportajen Umbelina dos Reis
Kandidatu independente ba Prezidente Repúblika (PR) tinan 2022-2027, Hermes da Rosa Barros, promete sekarik manan, sei hala’o diálogu ho órgaun kompetente sira, partidu polítiku inklui hadi’a hikas Timor nia reputasaun iha mundu internasionál.
Programa sira ne’ebé kandidatu ne’e sei halo, bazeia de’it ba Konstituisaun haruka ne’ebé hatuur objetivu fundamental artigu 6, 74 to’o artigu 91 ho nia prinsípiu paz, unidade no estabilidade liu hosi halo diálogu.
“Motivu ne’ebé mak ha’u hakarak kandidatu-an ba Prezidente Repúblika, tanba ukun ne’ebé mak agora la’o ne’e la di’ak, ha’u atu ba halo mudansa. Motivu sira seluk mak konsiénsia mai husi ha’u rasik hanesan sidadaun Timoroan, depois oferese ha’u nia matenek no esperiénsia atu nune’e tuir duni lei ne’ebé haruka hodi hadi’a rai doben Timor-Leste,” Hermes hatete iha Salaun CNE, 28/02.
Kandidatu independente ho númeru sorteiu 2 ne’e hatete, karik nia eleitu ba PR, uluk liu hakarak halo diálogu ho órgaun sira seluk, partidu polítiku sira hodi garantia nia servisu ne’ebé di’ak.
“Segundu ha’u husu ba Parlamentu atu husu deskulpa ba Nasoesn Unidas konabá pozisaun Timor nian ne’ebé mak halo, hodi fo votu abstensaun iha Nasoens Unidas. Terseiru ha’u iha planu ona atu harii uma duut iha palásiu prezidensiál nia kotuk, para aban bainrua orsamentu ne’ebé mak ha’u asina, ha’u nia asinatura ne’e deklara ho naran lulik, katak orsamentu estadu ne’e utiliza duni ba nesesidade povu nian,” Hermes hatete.
Kandidatu ne’e hateten, durante ne’e nia esforsu maka’as, ikus mai admitidu duni iha Tribunal Rekursu, tanba ne’e depois de eleisaun governu tenki rembolsa fali sira tuir lei ne’ebé hatuur ona.Tuir oráriu kandidatu indepedente ne’e sei halo mini kampaña abertura iha munisípiu Aileu, Suku Seloi.
