Reportajen David da Costa Gusmao
Portavoz Pedro António Dos Santos informa, komunidade bairo Hudi Laran Suco Bairo Pite la simu deklarasaun husi Helder Monis Alves nian iha loron 26 Fevereiru 2022 ne’ebe koalia iha nutísia telejornal GMNTV katak Aniceto Brites mak fa’an ona rai hektares rua iha bairo Hudi Laran ba familia Alves.
“Ami hakarak deklara ba Publiku katak, familia Alves rasik maka fa’an hotu Rai Domingos Alves nian ne’ebe lokaliza iha Bairo Hudi Laran suco Bairo Pite ba maluk timoroan seluk, laos Aniceto Brites ho komunidade iha ne’e mak faan rai hektares rua ne’e,” Dehan portavoz pedro António liuhosi press komferensia iha aldeia Teki-Teki, Suku Bairo Pite, Segunda 28/02.
Maibe akordo ne’ebe halo atraves husi terras propriedade ho familia Alves, nu’udar kontribuisaun hodi loke dalan tama ba Rai Domingos Alves nian ne’ebe Nuno A. Monis M. Alves fo aluga ba kompañia INTERNASIONAL INVESMENT (TIMOR) Lda atu hodi loke Hotel Villa Diplomata iha ne’e.
“No ami mos simu kompensasaun husi kompañia INTERNASIONAL INVESMENT (TIMOR) Lda, sira fo osan ba ami ne’e laos hola rai ne’e, maibe sira fo osan hanesan fo ganti rugi deit ba sasan sira ne’ebe sira hasai, ne’e laos familia Alves maka fo kompesasaun ba ami, sekarik familia Alves iha osan, tanba sa mak sira tenke fa’an hotu rai Domingos Alves nian ne’e ba ema seluk?,” esplika nia.
Ho ida ne’e komunidade bairo Hudi Laran husu Helder Monis Alves atu tun mai bairo Hudi Laran hodi hatudu rai hektares rua, ne’ebe maka Aniceto Brites fa’an ona ba familia Alves, no familia Alves deklara ona entrega ba Governu liuhusi Sekretáriu Estado Teras e Propriedade hodi halo investimentu.
“Relasiona ho problema refere, ami mos husu ba Ministeriu da Justica ho CAC atu forma equipa investigasaun indepente ida tun mai iha terrenu, hodi investiga problema refere, tamba ami diskonfia funsionáriu husi Terras e Propriedade balun involve komete pratika aktu mafiozu balun hodi viola povo nia direitu iha futuru oin mai,” tenik nia.
Entertantu kazu ne’e Anceito Brites ho komunidade halo ona mediasaun ba iha Sekretáriu Estado Terras e Propriedade maibe laiha solusaun, no problema ne’e Anceito Brites rasik lori ona iha Tribunal no agora prosesu ne’e lao ona iha Tribunal.
Iha fatin hanesan Abrão Soares nu’udar mós hola rai iha Aldeia Teki-Teki, suku Bairo Pite ne’e dehan nia hola rai ne’e iha tinan 2016 husi Alberto Alves, laos husi Anceito Brites ho komunidade iha Bairo ne’e.
“Hau hola rai ne’e iha 2016, rai ne’e nia luan mai ne’e 40 no nia naruk ba kotuk 47, hau sosa husi Alberto Alves. Iha akordu sosa rai ne’e partisipa husi Xefe Suku Bairo Pite, xefe Aldeia Teki-Teki no Vitaba. Momentu hau hola, sira dehan asesu dalan mak tun mai ne’e ida bengkel, ne’e sira ih kompensasaun hotu ona, no dalan tun mai kareta nian ne’e ,maibe dalan ne’e livre ema atu utiliza,” dehan nian
