Reportajen David da Costa Gusmao
Relasiona ho publikasaun peskiza konaba kazu Topu Honis nian, ne’ebé deskonfia involve eis-Diretór Comisaun Justisa no Paz (CJP) Dioseze Dili, arguidu Padre Hermínio Fátima Gonçalves no arguidu nain tolu José Cardoso Moreira, Andre Gonçalves no arguida Libania Martins Amaral, ohin Tribunál Distritál Dili (TDD) absolve kazu arguida na’in haat.
Iha kazu ne’e Ministériu Públiku akuza arguidu sira ba pratika krime violasaun ba krime segredu justisa nian ne’ebé previstu iha artigu 291 husi Kódigu Penal Timor Leste.
Maibe Iha Sesta loron 4 fulan Marsu tinan 2022 ne’e, liu husi leitura sentensa ne’ebe lee husi Juiz prezide Evangelino Bello, deside absolve arguidu na’in haat husi krime violasaun segredu justisa ne’e, tanba tribunál konsidera faktus la provadu, katak arguido na’in haat maka publika konteúdu relatóriu CJP ne’e.
Tuir deklarasaun arguido no sasin sira katak, maske arguidu maka fó kopi ida ba Arsebispu Arkidioseze Metropolitana Díli, Virgílio do Carmo da Silva, lider Kay Rala Xanana Gusmao no padre ida tan, maibe ho orientasaun husi Bispu Diocese Dili, Virgilio do Carmo da Silva no kopia ida ba Kay Rala Xanana Gusmao, maibe ho konfidensiálidade no arguidu laiha koñesimentu katak Xanana entrega tan ba iha Barbara Oliveira liu husi nia laen Joaquim Fonseca.
Tribunál mós konsidera arguidu sira halo peskiza ne’e bazeia ba orden husi Arkidioseze Metropolitana Díli, Virgílio do Carmo da Silva, iha ámbitu misaun husi Komisaun Justisa no Paz (CJP) nian bazeia ba preokupasaun labarik na’in tolu liga ho kazu eis padre Society of the Divine Word (SVD) Richard Dasbach.
Nune’e mós tribunál la identifika katak arguidu na’in haat maka publika relatoriu ne’e, inklui labarik nia naran ne’ebe iha ligasaun ho investigasaun Ministériu Publiku nian konaba ba kazu Eis Padre Society of the Divine Word (SVD) Richard Dasbach, tanba ne’e tribunal konsidera laiha faktus, ne’ebe provadu hodi lori arguidu sira ba prizaun liga ho krime ne’ebe imputa ba arguidu sira.
Maibe iha faktus balun provadu katak arguidu sira maka halo peskiza ba preokupasaun labarik na’in tolu ho autorizasaun husi Arkidioseze Metropolitana Díli, Virgílio do Carmo da Silva.
Audiénsia julgamentu preside husi Juiz singular Evangelino Bello, Ministériu Publiku reprezenta husi Prokuradór Matias Soares, no arguidu sira hetan asisténsia legal husi Advogadu privadu Miguel Faria no Madre Tomazia Maria de Deus.
