Reportajen Adroaldo ‘Saretukau’
Kandidatu independente ba Prezidente Repúblika, Dr. Antero Benedito da Silva, hala’o nia kampaña da-toluk ho tipu diálogu popular hamutuk ho to’os na’in no komunidade munisípiu Aileu, hodi hato’o nia perspetiva dezenvolvimentu ida ne’ebé hahu husi baze, inkorpora lisan, kultura no kuidadu ba ekolojia mak fundasaun prinsipal ba bem-estar povu nian.
Kandidatu Antero ho númeru sorteiu 10 hatete, sira nia prezensa ne’e iha bee matan, bee dois ne’ebé lokaliza iha zona Faturilau, munisípiu Aileu, atu to’o iha ne’ebá sei liu hosi Fahisoi tuun Namolesu, liu ba Berlihu, depois hakat ba Faturilau, iha ne’ebé bee manas refere lokaliza ne’ebá.
Kandidatu ho númeru sorteiu 10 ne’e hatete, zona Faturilau iha bee boot no manas tebes, tuir sira nia imajinasaun, se zona refere halo investimentu di’ak hodi hodi loke estrada tama ba bee manas Bee dois, sei tulun hasa’e ekomia familiar iha fatin ne’ebá.
“Ita bele transforma zona iha komunidade nia moris ne’e ho ideias barak, bele ho kuidadu teras serin, prepara hahan sira ne’e, prepara fatin ema deskansa i sai zona turístiku ekolójiku, hanesan ita labele tesi ai arbiru,” kandidatu ho númeru sorteiu 10 ne’e nia perspektiva ba dezenvolvimentu rural.
Nia akresenta iha zona Faturilau ne’ebá bibi Rusa nia fatin mos. Nia aumenta ita ba iha Faturilau, Erlihu Maubere, iha mota balun iha ne’ebá, liu ba Fatukalu, liu ba aldeia Macucurian to’o suku Funar, Postu Laclubar, zona ida izoladu maibé nakonu ho kultura no lisan oi-oin, tanba ne’e presiza dezenvolvimentu.
“Zona hirak ne’e hanesan zona izoladu, difísil hetan líder sira iha zona sira ne’e, maibé povu moris iha ne’ebá ho sira nia kulturas, uma lisan sira, sai fatin ne’ebé ami hanoin katak, estadu podia halo investimentu ba ida ne’e,” nia esperansa ba dezenvolvimentu iha baze.
Nia hatutan, sira ko’alia ida ne’e tanba hamutuk ho estudante sira sempre halo prátika iha ne’ebá, sira hetan apoiu hodi kuda tanjarina rihun ida resin iha ne’ebá, nia dehan “ami hakarak temi ida ne’e atu polítiku sira, Parlamentu Nasional halo debate orsamental, tau atensaun ba asuntu sira hanesan ne’e.”
“La’os ami mesak mak ko’alia ida ne’e, Dom. Carlos Filipe Ximenes Belo, haruka mensajen mai ami nia telefone dehan katak, husu ba komunidade, governu para promove buat ida tara-bandu ne’e, para halisan fali ita nia lisan sira, bee matan, ai lulik,” Antero temi mensajen Bispo Belo nian.
Dr. Antero Benedito hato’o alternativa real hodi hatene kondisaun loloos povu Maubere! Hanoin ida ne’e kadi iha tinan barak hamutuk ho to’os na’in no komunidade sira iha baze.
