Reportajen Adroaldo ‘Saretukau’
Kandidatu independente ba Prezidente Repúblika ho númeru sorteiu 7, Milena Pires hala’o nia kampaña da-toluk nian, ho tipu diálogu dada lia hamutuk ho estudante sira no Xefe Aldeia Kesa-Mau, suku Kasa, postu administrativu Ainaro Vila, munisípiu Ainaro, identifika estudante barak abandona eskola iha aldeia Kesa-Mau tanba la’o ho distánsia dook.
Iha dada lia ho estudante sira, Milena hatete husi sira ha’u simu informasaun konabá joven ne’ebé forsadu, hodi para eskola depois de kompleta eskola primária tanba atu kontinua ba eskola sekundária sira tenke la’o loron ida oras 3 atu ba Kasa ou Ainaro. Balun konsege duni hela hamutuk família no kontinua eskola maibé barak la toman hela ho família sira no la konsege la’o ho distánsia dook ne’e no tenki para eskola.
Tuir eis-Embaixadora ne’e nia estimativa, hamutuk 30-40 estudante para eskola iha tinan 2021, ida ne’e impaktu boot tebes ba estudante iha teritóriu abandona sira nia eskola no difikulta sira nia estudu.
“Ha’u imajina iha suku ida de’it mak ema para eskola hamutuk média 36 iha tinan 2021, iha sukus hamutuk 452, tinan ida de’it ita bele dehan iha territóriu tomak númeru estudante para eskola husi eskola pre-sekundáriu hamutuk 2,602,” hakerek Milena iha nia pájina ofisial Facebook.
