Reportajen Calisto dos Santos Oqui
Iha kampaña diálogu husi kandidatu Prezidente Republika, Virgilio da Silva Guterres ‘Lamukan’ iha Tutuala munisipiu Lautem, ba komunidade sira Lamukan dehan As’wain Tutuala Konis Santana hateten, Konis Santan laos mate iha Tutuala ou iha nia knua, maibe mate iha rai Mertutu Ermera, hodi defende rai hotu, rai ne’ebe ho nia motto katak ba Timor-Leste ida faternu liu, katak Timor-Leste ida deit laos iha rua, la hanesan ema balu dehan lorosa’e no loro monu.
Lamukan dehan Timor-Leste ida deit hanesan as’wain Nicolau Lobatu hateten, husi Jaco to’o Oe-cusse rai ida deit, ema ida labele fahe, povu ida deit, sentimentu ida deit, hanoin ida deit, hakarak ida deit, ukun rasik-an ida ne’e mak Konis ho Solan defende ita nia ukun rasik-an
“Timor-Leste ida fraternu liu katak, ita tenke haree malu hanesan maun alin, haree malu hanesan inan feton, ita bele partidu oi-oin, diferensia politika iha nivel estrategia ho nivel tatika, atu alkansa ita nia objetivu maibe diferensia sira ne’e labele lakon respeitu ba malu”, dehan Lamukan iha Tutuala, 09/03.
Relasiona ho liafuan manu futu ne’ebe espalla iha sosial media, kandidatu Prezidente ne’e hateten ita harii kultura hanesan manu futu, bainhira ita fila tenke lori manu mate, “iha demokrasia laiha manu mate, ita konkista povu nia konfiansa iha eleisaun jerál atu lori ukun serbí povu, laos halo povu sai atan ba podér, laos kada tinan 5 ita mai bosok povu hili ita, ita ukun tiha haluha serbisu povu, no laos ukun hanesan Solan ho Konis defende povu”.
Lamukan mos hanoin fila fali Konis Santana nia kontribuisaun oinsa próteze ambiente Konis dehan bainhira ukun-an, ita sei la halo ita nia rai ne’e naruk liu ou rai ne’e luan liu, Buat ne;ebe mak halo ita ran ne’e boot liu mak próteze ita nia rai nia furak, ita nia beleza no natureza, hodi transforma ekolójiku iha Timor-Leste
“Sei deit mak kaer nasaun ne’e, iha Konstituisaun hatete ita artigo 6 koalia konaba objetivu estadu, promover um dezemvolvimento armonioju e integradu, sente parte benefisiu husi parte dezemvolvimentu ne’e la’os grupu ida deit mak hetan benefisiu sira seluk sai vitima. Agora tempu to’o ona ba jerasaun foun kontinua luta, asume responsabilidade servi povu, no servi nasaun ida ne’e hadia povu nia moris no estadu nia dignidade. Karik imi fo fiar mai hau, ita sei kontinua saida mak Konis ho Solan hamenu ona”, dehan Lamukan
