Reportajen David da Costa Gusmao
Kandidatu Pezidente Repúblika (PR), Martinho Gusmão, eleitu ba PR hakarak ajuda Parlamentu Nasionál no Tribunál, atu tau ai-rin haat ne’e hamutuk hodi tane sae Timor-Leste. Tanba ida ne’e maka kandidatu hakarak marka deferénsia ho kandidatu sira seluk, kandidatu la mai konta istória maibe mai halo konsensu nasionál no kompromisu polítiku.
Kandidatu Pezidente Republika (PR) ho númeru sorteiu 13, Martinho Germano Da Silva Gusmão dehan iha nia kandidatu ne’e, iha buat rua ne’ebe maka importante ida konsensu nasionál no kompromisu polítika.
“Iha konsensu nasionálál hau hakarak mobiliza nasaun tomak, atu hamutuk ita haree ba revolusaun ba edukasaun, ita hatuur justisa iha nia fatin, no ita hari haburas kultura damen nian,” informa kandidatu PR, Martinho Gusmão ba jornalista sira, bainhira halo nia komísiu kampaña ba dala sia iha Tasitolu, Kuarta 9/03.
Nia hateten bainhira koalia konaba kompromisu polítiku, Prezidente Repúblika, hakarak ajuda Parlamentu Nasionál no Tribunál hosi tau ai-rin haat ne’e hamutuk atu tane sae nasaun Timor-Leste.
“Hau eleitu ba Prezidente Repúblika hakarak ajuda Parlamentu Nasionál no Tribunál atu ai-rin haat ne’e hamutuk hodi tane sae nasaun Timor-Leste nu’udar ita nia uma. Tanba ida ne’e maka hau hakarak marak deferénsia ho kandidatu sira seluk, hau la mai konta istória maibé hau halo konsensu nasionálál no kompromisu polítiku,” tenik nia.
Nia haktuir ida ne’e depende ba fali povu maka deside hakarak ba oin ka ba kotuk. Hakarak ba oin mai hamutuk atu hadia edukasaun, hatuur ikas justisa no hamoris kultura no damen. Povu hakarak konta istória pasadu sei la manan.
“Depende ba povu hakarak atu hadia edukasaun, hatuur ikas justisa, no povu hakarak atu hamoris kultura damen nian hau manan. Mas povu hakarak konta istoria pasadu deit hau la manan,” nia dehan
Nia salienta kompromisu polítiku, halo porque labele sai prezidente ida ne’ebè sokar lia ho orgaun sira seluk no selok malu ho orgaun sira seluk.
“Hau hanoin sei pozisaun PR ida ne’e povu hili, Hau prontu ona tur iha aitarak laran, tanba ida ne’e mak hau mai tuir iha elisaun, prontu fó mudansa foun no oinsa atu harii nasaun no harii estadu,” hakotu nia.
