Reportajen Silvino Freitas
Kandidatu Prezidente Republika 2022-2027, Lere Anan Timur promete bainhira eleitu ba Prezidente Republika, sei sai guardian ba Konstituisaun, lakohi interpreta konstituisaun no lakohi atu servisu ho asesór internasionál.
Tuir Lere Konstituisaun mak sai klamar estadu nian, tanba ne’e wainhira eleitu ba Prezidente Republika sei sai guardian hodi defende no kumpre de’it ba Konstituisaun RDTL.
“Hau sei obriga sidadaun hotu atu kumpre konstituisaun, ema hotu tenke iha lei nia okos laiha ema ida mak iha fali lei nian leten, primeiru Maromak no segundu mak Konstituisaun” dehan Lere Anan Timur iha nia komísiu ikus iha Kampung-Baru Komoro,(16/03).
Nia mos promete bainhira sai Prezidente lakohi servisu asesór husi rai liur, no hakarak de’it atu servisu hamutuk ho asesór timoroan sira, nunee bele kumpre didiak knaar ne’ebé nia halo nu’udar Prezidente Republika.
“Tanba ita nia Konstituisaun, hatuur iha kultura tradisaun nia leten, povu ida laiha tradisaun, laiha mos klamar, tanba ne’e mak hau nia asesór tenki timoroan, hau presiza de’it mak pais lingua portugues sira, atu ajuda halo redasaun hakerek karta, hakerek ho portugues tanba lingua ofisial” dehan Lere.
Tuir nia presiza liu asesór timoroan, tanba wainhira Prezidente halo sala, nia mos sala nune bele simu hotu todan, diferensa ho asesór internasionál, sira halao servisu ne’ebé la los no Prezidente sala, nia halai nunee prezidente mak simu todan, bainhira eleitu ba Prezidente Republika lakohi interpreta lei, maibe kumpre de’it saida mak hakerek ona iha Konstituisaun, mutin entaun mutin ona, metan entaun metan ona.
