Reportajen Santina Lucia da Costa
Abertura kampaña segundu ronde ba kandidatu Prezidente Republika, ho Numeru sorteiu 2, Dr. Francisco Guterres Lú Olo, iha Gleno Munisipiu Ermera, Lú Olo hateten prontu nafatin ba segundu ronde, la rende, esperansa mate ikus, sei hakat dala ida tan.
Iha abertura ne’e, kandidatu Prezidente Republika, ho numeru sorteiu 2 hateten ba povu Ermera, ba kuadrus militantes partidu FRETILIN, PLP, KHUNTO, ho partidu sira seluk, ne’ebé fó apoiu ba nia kandidatura katak, Lú Olo prontu nafatin para ita hakat dala ida tan ba segundu ronde.
“Hau prontu nafatin ba segundu ronde signifika katak, Lú Olo la rende ida, esperansa mate ikus katak, sei hakat dala ida tan.”Afirma kandidatu PR Lu Olo iha Kampu Futebol, Gleno, Sabado, 2/4.
Lú Olo hatutan ohin mai para hamriik dala ida tan ho povu Ermera atu hateten, prosesu primeira eleisaun seidauk hotu, agora hakat ba segundu ronde, hakarak husu ba povu Ermera vota ba Numeru 2 para atu hakat dala ida tan ba Aitarak Laran, Lú Olo hakarak manan iha Ermera.
Kandidatu Numeru sorteiu 2 ne’e dehan, mai dala ida tan hamutuk ho imi povu Ermera, Partidu FRETILIN, PLP, ho KHUNTO ho partidu seluk nia militantes iha ne’e, imi vota ba Lú Olo iha loron 19 Abril agora para atu hakat dala ida tan ba Aitarak Laran, sai Prezidenti Republika Timor-Leste no Prezidente ba Povu Timor-Leste.
“Hau senti orgullu tebes tanba iha primeira ronde hau mai ho Partidu Os Verdes, ohin loron hau bele mai tan ho Prezidente PLP, Taur Matan Ruak, ne’ebé ami na’in rua hamutuk 24 anos iha ai-laran, hau mai nafatin hamutuk ho Sekretáriu Jerál FRETILIN, Dr. Marí Alkatíri, no mai hamutuk mós ho Naimori hanesan Konselleiru KHUNTO, hau senti orgullu boot ita iha kbiit para iha Ermera numeru 2 bele manan ih segundu volta.” Hateten, Lú Olo.
