Reportajen Silvino Freitas
Kandidatu Prezidente Republika, Dr. José Ramos Horta bainhira eleitu sei serbisu hamutuk ho governu, hodi investe makaas iha seitor produtivu, no halo reforma ba microfinance hodi fo benefísiu diretamente ba povu nia moris diak, no tau atensaun ba joven ho idade produtivu.
Tuir Portavoz Politiku, Deonisio Babo hateten Jose Ramos Horta bainhira eleitu sai Prezidente sei mantein nafatin paz no estabilidade, no dudu governu hodi aposta iha programa ne’ebé fo benefísiu diretamente povu.
“Programa sira ne’e barak halo tiha ona iha uluk no governu ida agora foin hahu book maibe uza ona hanesan sira nia protestu politika hanesan kampaña, maibe ita hanoin katak importante mak enfatiza nafatin” dehan Deonisio liu hosi konferensia imprensa iha sede nasional kandidatu prezidente republika José Ramos Horta Hudi-Laran,(04/04).
Tuir nia iha programa prioridade ne’ebé José Ramos Horta bainhira eleitu sei hamutuk ho governu hodi bele realiza mak ida prosesu desentralizasaun administrativa, segundu kontinua halo reforma ba ekonomia iha microfinansa, tuir mai mak kontinua aposta iha reforma legais ne’ebé kontinua uluk ona, no governu ida ne’e la konsege halo, no ikus liu mak dezenvolvimentu kapitál sosiál hodi investe makaas iha setór produtivu hanesan uma ba ita nia povu sira ne’ebé laiha kbiit, dada emprezáriu internasionál no tau atensaun ba joven sira ne’ebé maioria tama ona ba idade produtivu.
“Prezidente Repúblika foun tenke komprende, obriga mos governu atu aposta iha programa produtór sira ne’e, hodi fo benefísiu ba joven sira, liu liu tanba numeru dezempregu iha ita nia rain as tebes, no haree ba kreximentu ekonómika ne’ebé monu tiha kedan ba negativu, ne’e halo ita nia nasaun kiak tebes iha mundu” nia dehan.
Nia konklui katak situasaun sira ne’e akontese tamba ita iha jestaun lideransa todan mai hosi pandemia COVID-19 hodi halo ekonomia Timor monu nune prejudika sidadaun timoroan tomak.
