Reportajen David da Costa Gusmao
Reprezentante Nasoens Unidas Programa Ai-han Mundial (WFP) Iha Timor-Leste Dageng Liu informa, ohin WFP simu fundu umanitária hamutuk $1.5 millaun husi Governu Timor-Leste, hodi fó apoiu asisténsia umanitária ba iha povu Ukránia.
Iha situasaun emerjénsia ida ne’e, doasaun ne’ebé governu oferese sei ajuda WFP, hodi fó asisténsia ba povu Ukránia ne’ebé presiza tebes asisténsia tantu iha Ukránia laran no liur.
“Ami agradese Governu Timor-Leste, tanba sira nia jenorosidade no solidariedade ba povu Ukránia,” Dagen Liu hateten iha komunikadu imprensa ne’ebé maka Neon Metin asesu hosi WFP iha loron Sesta 8/04.
Iha komunikadu ne’e haktuir WFP estende ona ninia operasaun hodi ajuda ema millaun 3 resin ba Ukránia ho asistensia ai-han no mós osan, no refujiadu hamutuk 300,000 mak dezloka ona ba nasaun viziñu sira, no populasaun hamutuk millaun 1 resin mak hetan ona asisténsia iha Ukránia.
Tanba ‘onflitu ida ne’e mós rezulta folin ai-han sa’e no fó ameasa ba seguransa ai-han globalmente ba uma-ka in millaun resin. Seidauk to’o fulan, folin ai-han no mina folin globalmente sa’e tanba impaktu husi konflitu refere. Folin ai-han sa’e maka’as husi tempu ba tempu inklui mós folin ba produtu granula sa’e to’o 24%.
Iha komunidadu ne’e Ministru Prezidénsia Konsellu Ministru, Fidelis Leita Magalhaes hateten doasaun ida ne’e validu ba povu Ukránia hamutuk rihun atus ida inklui sira ne’ebé evakua husi sira nia uma, no agora daudaun buka hela asistensia umanitária urjente iha Ukránia laran no rai liur.
“Hanesan nasaun ida ne’ebé esperiénsia situasaun oin-oin iha pasadu husi kauza funu no konflitu, ita komprende di’ak tebes impaktu husi krize agora ba povu Ukránia. Ita espera katak kontribuisaun ida ne’e bele tulun sira,” Fidelis hateten iha komunikadu.
