Reportajen Zevonia Vieira
Kazu pedófila nu’udar kazu violasaun sexual ne’ebe halo husi ema ho idade boot ba labarik sira, iha Timor kazu ne’e akontese ona, no autór ba pedofilia hetan ona nia sansaun hodi hela iha sela durante tinan 12.
Iha ámbitu eleisaun kampaña eleisaun prezidensiál ba ronde daruak, Neon Metin halo entrevista ho kandidatu Prezidente Republika, Dr. Francisco Guterres Lu Olo, hodi husu nia hanoin konaba kazu pedofilia ne’ebe akontese iha Timor, sekarik eleitu sai Prezidente, oinsá konaba indultu ba autór pedófila iha Timor-Leste?
Ba Neon Metin Lu Olo hateten klaru kazu sira hanesan pedofilia, tenke halo prevensaun espesiál no prevensaun jeralmente
Nia dehan atu halo prevensaun espesiál ba kondenadu, ne’ebé maka bainhira kondenadu ne’e kumpri nia pena, maka bainhira nia sai ba re-integra fali ba sosiedade, atu labele komete tan hahalok ida ne’e no prevensaun jerál e mais lisaun ida ba ema hotu atu labele halo tuir pedófila nia hakarak.
Entretantu Lu Olo mos fó nia solidariedade ba vítima kazu pedófila iha Rejiaun Administrativu Espesiál Oe-cusse Ambeno ( RAEOA).
“Hau nia solidariedade tomak ba sira hotu ne’ebé mak sai vítima ba kazu pedofilia iha Oe-cusse, no dezeju katak pisikolojikamente sira bele rekupera fali, hau hatene katak buat ne’e todan, no todan iha sira nia konxiénsia, i hau senti saida maka sira senti. Hau so dezeju deit maka ne’,e para sira hotu bele rekupera fila fali iha sidadaun hotu nia leet,” kandidatu Lú Olo dehan ba Neon metin bainhira remata debate kandidatu Prezidente Republika Iha salaun Mauoka, Kuarta 13/04.
