Reportajen Santina Lucia da Costa
Prezidente Konsellu Imprensa (KI), Virgilio da Silva Guterres “Lamukan”, enkoraja responsavél sira iha Sentru Formasaun hotu, atu buka tempu diskute hamutuk ho Konsellu Imprensa koalia kona-ba Kurríkulu Formasaun Jornalista no silabus sira, hodi foka ba kapasidade intelektuál jornalista nian.
Prezidente Konsellu Imprensa (KI), Virgilio da Silva Guterres “Lamukan”, koalia asuntu ne’e liuhusi seminariu ho tema “Jornalizmu Ameasa Dijitalizasaun” iha ambitu komemorasaun loron liberdade imprensa ne’ebé realiza iha salaun Delta-Nova.
“Hau hakarak enkoraja nafatin responsavel sira ba sentru formasaun hotu-hotu, Konsellu Imprensa iha tempu badak iha ona diskuti kona-ba oinsa atu tur hmutuk kona-ba opiniaun koalia kona-ba kurikulu formasaun ba jornalista sira, silabus.” Hateten, Prezidente KI, Virgilio da Silva Guterres “Lamukan” iha salaun Delta Nova, loron tersa-feira, 3/5.
Prezidente KI dehan Konsellu Imprensa ninia fokus oinsa foka liu ba kapasidade intelektual jornalista ninia, teknika atu kaer kamera ka entrevista, ne’e kuaze maioria domina, mais importante ida ita falta maka kapasidade jornalista nian atu interpreta faktu, tanba jornalizmu la’os de’it atu aprezenta faktus, maibé kapasidade jornalista nian atu interpreta faktus, ida ne’e mak ita presija.
“Kapasidade atu interpreta depende mós ba ema nia formasaun, iha oportunidade balun hau hateten ona katak, jornalista pelu menus tenke iha koñesimentu ba ramu rua iha siensia sosial nian, ida maka sosiolojia no Istoria, pelu menus tenki domina buat rua ne’e, entende buat ruma.” hatutan Lamukan.
Lamukan afirma iha sosiolojia ne’e ema na’in tolu nia hanoin mak ita tenki pelumenus buka hatene, maka Max Weber, Karl Marx, Emile Durkheim, na’in tolu ne’e mak tripe ba jornalista sira nian, jornalista sira tenke buka hatene sira nia entendimentu. Depois Ita nia Istoria, ita koalia ba faktus, entaun istoria importante ba jornalista sira.
Tanba ne’e Lamukan enkoraja jornalista no estudante sira sei estuda iha universidade, karik aban bainrua hakarak sai jornalista tenki aprofunda koñesimentu iha area importante sira ne’e, tanba bainhira koalia kona-ba komunikasaun sosial ita tenki domina kapasidade atu komunika, no sosial ita tenki hatene kona-ba sosiedade, sosiedade ne’ebé ita serbi lorloron.
