Reportajen David da Costa Gusmao
Tuir dadus ne’ebe relata hosi Diresaun Nasionál Saúde Publika (DNSP) no Departamentu Vijilánsia Epidemiolojia Ministériu Saúde (MS) nian, ne’ebe Neon Metin asesu ohin Ministru Saúde (MS) rejista kazu dengue foun na’in 16, nune’e kazu dengue akumulativu hamutuk 5,027 no obitu 56.
“Situasaun kazu dengue Iha Timor-Leste, ohin loron dia 31 de Maiu, kazu dengue foun 16, no husi total kazu foun ne’ebe relata mai husi Munisípiu Dili, Liquiça no Viqueque, kazu dengue kumulativu hamutuk 5,027, obitu hamutuk na’in 56,” hateten iha komunikadu imprensa ne’ebe neon metin asesu iha loron Tersa 31/05.
Kazu dengue maioria deteta husi Munisípiu Dili ho total 3478, Baucau ho kazu 331, kazu, Manufahi kazu 202, Manatuto ho kazu 175, Lautem ho kazu 155, Covalima ho kazu 149, Liquica kazu 142, Ermera ho kazu 118, Aileu ho kazu 85, Viqueque 83, Bobonaru ho kazu 58, Ainaru ho kazu 45, no RAEOA ho kazu 6.
Em geral kazu dengue espalla ona iha territóriu Timor Leste laran tomak. iha fulan Dezembru 2021 kazu komesa aumenta ho total 225, maibe iha fulan Abríl 2021 kompara ho Abríl 2022 kazu barak liu ho total 700 kazu.
“Idade mais afetadu maka husi idade menus husi 14 anos mai kraik ho grupu idade 5-14 ho 42,0% no idade 1-4 ho 35,2%. Ho ida ne’e Attack Rate (AR) idade 1-14 anos a nivel Nacional ho 0.9%,” dehan iha komunikadu ne’e.
No kazu dengue distribuisaun tuir klasifikasaun dengue ho versaun foun tuir matadalan manajementu kazu ne’ebe relata husi municipio. Husi dia 10 de Abril ate presente maka Dengue Leve (DL) ho total 473 kazu, Dengue Moderadu (DM) ho total 255 kazu no Dengue Severa (DS) ho total 46 kazu.
“Kazu obitu iha inicio tinan 2022 ate a data ho total 56 obitos ida ne’e representa Case Fatality Rate nivel nasional ho porsento 1,1%,” haktuir iha komnikadu ne’e.
Ho ida ne’e Ministeriu Saude (MS) apela ba populasaun iha Dili laran no mós iha Munisipiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, wainhira sente isin-manas, ka Senti laran sa’e,liman ain no sikun moras hodi bele hetan atendimentu husi profisionál saúde sira.
