Reportajen estajiadu UNTL, Joselina dos Santos
Reprezentante Asosiasaun Halibur Defisiénsia Matan Timor-Leste (AHDMTL), Gaspar Afonso husu ba Diretór Ezekutivu Forum Organizasaun Naun-Governamental Timor-Leste (FONGTIL), foun Valentino Xisto da Costa “Koko” katak FONGTIL tenke forte, hodi kontinua serbisu ho kritíka atu fanu ema hodi ukun ho lia loos no justisa.
“FONGTIL nia kritika ne’e importante, atu bele fanu no fó hanoin ema, tanba dala ruma ema ba ukun ne’e ho tilun mos bele la rona no matan mos la haree, nune’e husu ba FONGTIL nafatin fanu sosiedade sivil hotu tenke ativu no inklui,” dehan Reprezentante AHDMTL Gaspar Afonso iha nia diskursu, iha salaun FONGTIL Caicoli, 31/05.
Iha diskursu ne’e Gaspar relata, Kna’ar foun ne’ebe nia asume hanesan asesór prinsipal ba Prezidente Republika iha Palasiu Prezidente ne’e lolo’os nia lakoi no hakarak iha HDMTL, maibe Prezidente Republika rasik fó deposita no konfiansa ba nia entaun tenke husik organizasaun, tanba Prezidente Republika rasik bolu nia la’os atu ko’alia asuntu difisiensia nian, maibe atu ko’alia asesór prinsipal ba asuntu sosial nian.
“Orgullu bo’ot tanba ha’u nia movimentu ezisténsia durante ne’e observasaun hela husi aman fundadór sira, nune’e mehi atu sai gustur iha timor mak eskada ida sa’e dadaun ne’e,” nia tenik.
Nia husu FONGTIL no ONG sira seluk nafatin suporta, tanba nia lakohi hetan priviléjiu hanesan asesór ne’e dala ruma ema dehan tan hetan salariu diak ita haluha malu, nune’e nia espera katak ba oin, bele enkontru regular entre FONGTIL ho nia membru sira, karik bele fulan tolu dala ida atu bele aumenta nia kilat musan hodi bele ko’alia ba Prezidente Repúblika.
“Kada departamentu iha palasiu prezidente kada semada sempre iha enkotru ho Prezidente 15-30 minutus atu fo hanoin ba prezidente, orgullu tebes tanba karta ofisial ne’ebe fahe ba postu no munisipiu ne’e mensiona ha’u nia naran katak ha’u sei ba lidera departamentu sosiedade sivil iha palasiu prezidente,” nia relata.
