Reportajen Adroaldo “Saretukau”
Xefe Suku Bene-Ufe, Postu Administrativu Nitibe, RAEOA, Marcos Meni informa, nia populasaun uma-kain 200 resin iha aldeia Manan, seidauk asesu rede telekomunikasaun Telemor ho Timor Telecom (TT), nune’e difikulta tebes populasaun sira halo kontaktu via telefónika, aleinde ne’e difikulta mos halo kontaktu ba iha Ospital Oe-cusse, bainhira komunidade hetan moras grave iha Sentru Saúde Bene-Ufe.
Líder lokal ne’e hatete, preokupasaun ne’e mak komunikasaun, iha nia aldeia ida iha uma-kain 200 resin la hetan rede telemóvel, Telemor ho Timor Telecom. Líder suku ne’e mos relata, iha edifísiu ida iha Suku Bene-Ufe ne’ebé uluk utiliza ba fatin karantina oras ne’e atu halo lansamentu iha Oe-cusse hodi uza fila-fali ba iha Sentru Saúde suku nian, tan ne’e mak sei susar ba sira atu hetan kontaktu urjente ho ospital Oe-cusse, wainhira komunidade hetan moras todan.
“Maibé ida ne’e difikulta tebes ba iha komunikasaun bainhira ita hetan moras urjente karik atu kontaktu ambulánsia ne’e halo nusa,” preokupasaun xefe suku Bene-Ufe, Marcos Meni, ne’ebé hato’o ba Neon Metin, tersa-feira, 14/06.
Nia hatete, kliente ne’ebé uza SIM Card Telemor hamutuk 298, la inklui kliente TT nian, “uma-kain ida parese na’in tolu, na’in haat (kliente), mais agora kuandu telefone tenki halai mai aldeia sorin, aldeia viziñu Citrana mak hetan rede Telemor, ida ne’e mak problema, ho Timor Telecom, hanesan ha’u uza WA (WhatsApp) Timor Telecom, ha’u kal-kalan ba mota besik fronteira ne’ebá, mai fali Citrana, kalan boot mak ita muda tun sa’e,” dehan nia.
Líder suku ne’e informa, nia halo kontaktu ona ho kompañia Telemor atu harii antenna hodi aumenta kapasidade rede Telemor, maibé seidauk tanba sei iha problema entre rai na’in ho kompañia rasik iha kontratu nian hodi harii antenna refere. Iha sorin seluk, nia hatete, tanba kompañia Telemor rasik sei harii antenna balu iha Sakato no sira mos sei hein hela material sira hosi Vietnám hodi harii antenna, nune’e mak seidauk iha resposta pozitivu ba konstrusaun ne’e rasik.
