Reportajen Joanina Casemiro
Estrada Balibo – Dili presiza hadia tanba nu’udar dalan protokolu internasionál Viziñu ho Indonesia.
Tuir Prezidente Autoridade Munisipiu Bobonaro, Ernesto de Oliveira Barreto hatete, planu ba estrada refere submete tiha ona ba iha Nasionál, maibé husi Konsellu Ministru aprova de’it husi parte Nunura to’o iha Maliana.
“Ami nia planu hosi munisipiu ne’e tama hotu ona, atu hahu husi baliza Balibo vila tama to’o iha baliza Suai nian tama hotu ona, hein de’it atu implementa no mos planu husi nasional nian mos. Programa ne’e di’ak hotu maibé depende fila fali ba povu Timor-Leste, tanba tinan oin tama ona ba eleisaun jerál tanba ne’e maka povu maka sei julga governasaun ne’e, karik laiha ona konfiansa ba governasaun ne’e entaun depende fila fali mos ba governu tuir mai atu avansa ka lae,” hatete prezidente autoridade munisipiu Balibo, Ernesto de Oliveira ,ba jornalista sira iha Balibo. 15/10
Nia hatutan hanesan Prezidente Autoridade hare tuir de’it programa ne’ebé iha, no mos implementasaun saida de’it maka iha, tanba mandatu governasaun ida agora ne’e fulan oin hotu ona, karik iha kontinuidade ba programa hirak ne’e hanesan autoridade agradese tebes tanba iha ona implementasaun.
“Programa Dezenvolvimentu Nasionál Suku (PNDS) ne’e halo buat barak maka hanesan Uma Kbiit Laek regular, eskola estrada no seluk tan, tanba ne’e maka serbisu PNDS nian ne’e barak la halimar maibé sosiedade barak maka sei kestiona nafatin. Ita labele halo milagre iha tinan ida rua nia laran, iha buat balun ne’ebé ita halo tuir prioridade nasionál, no mos munisipiu nian tanba planu hotu mai husi Suku to’o iha postu no ba munisípiu, depois maka reuniaun iha Konsellu Munisipiu maka hare ida ne’ebé prioridade liu atu implementa duni,” Dehan Prezidente Autoridade.
