Reportajen Joselina Dos Santos
Kada tinan governu aprova Orsamentu Jeral Estadu (OJE), maibe la tau importansia ba ema ho difisiensia nian.Tanba ne’e, Assosiasaun Defísiensia Timor-Leste (ADTL), husu ba Parlamentu Nasional (PN) tenke tau Prioridade direitu ema ho difisiensia nian no aloka orsamentu ne’ebe maximu hodi bele responde ba nesesidade ema ho difisiensia nian.
Liu husi Konferensia Imprensa, Representante Assosiasaun Defísiensia Timor-Leste (ADTL), Rosalia T. Pereira hateten, Parlamentu Nasional (PN) ladun tau Prioridade ema ho difisiensia nia direitu maibé tau Prioridade liu kona-ba sosa Kareta paradu, kada tinan sempre aprova orsamentu mas nunka tau Prioridade ba ema ho difisiensia nian direitu tanba sá ema ho difisiensia mós iha direitu atu goza sira moris nune’e tenke tau atensaun mós ba ema ho difisiensia.
“Ami Agradese tanba temi ona ema ho difisiensia iha plenaria, maibé orsamentu ne’ebé sira aloka espesifiku ba asuntu ema ho difisiensia ne’e laiha, nune’e ami ezije nafatin ba governu wainhira ko’alia iha plenaria oinsá espesifiku ba ema ho difisiensia sira nian, tanba iha Parlamentu nain deputadu/a sira koalia iha parlamentu ne’e lahatene kona-ba nesesidade ida ne’ebé prioritariu ba ema ho difisiensia nian”, dehan Rosalia liu husi Konferensia Imprensa iha Edifisiu OXFAM, Segunda 21/11.
ADTL husu nafatin no halo advokasia ba parte governu nian atu nune’e aloka orsamentu karik tenke aloka ho maximu hodi responde ba nesesidade ema ho difisiensia sira nian, tanba difisiensia ne’e jeral de’it, maibé tipu difisiensia ne’e oin-oin tanba idak-idak mai ho kondisaun difisiensia ne’ebé lahanesan no mós nesesidade ne’ebe lahanesan.
