Reportajen Joanina Casemiro
Felisidade da Costa Soares (30) iha insiativa halo dose Corn Dog hodi sustenta família nia moris loro-loron, no mós haree alin nia eskola maske nia rasik hakarak atu kontinua iha universidade, maibé ekonomia família la sufisiente hodi ajuda nia ba tuur iha banku universitáriu.
Bainhira Neon Metin hakbesik ba negosiante ki’ik Felicidade da Costa Soares, nia hateten labele kontinua to’o iha nivel Universitáriu, tanba ekonomia la suporta, nune’e remata de’it iha eskola sekundáriu. ho ida ne’e iha hanoin ida mosu katak, oinsa mak bele ajuda fali nia alin sira no familia entaun komesa nonto youtube hodi aprende halo dose Corn Dog.
Nia dehan bainhira atu halo dose Corn Dog ne’e mós susar los, maske nonton iha YouTube maka halo tuir, maibé dose ne’ebé halo, sempre falla hela de’it. Esforsu ne’e la hamate Felisidade ho nia bin nian espíritu atu aprende halo dose Cron Dog ne’e to’o hetan nia rezultadu.
“Prosesu foun-foun halo Corn Dog ne’e laos husi hau, maibé ne’e inisiativa hosi hau nia bin, ami komesa halo koko iha uma, depois dose ne’e la jadi hela de’it, maske la jadi maibé ami koko kontinua aprende liuhosi youtube mas la jadi maibe ami tenta nafatin to’o ami buka hetan nia resenta depois ami halo jadi tiha,” dehan Felisidade ba Neon Metin, iha Kaikoli segunda 21/11.
Bainhira dise ne’ebé sira halo jadi ne’e sira fa’an iha kampus Liceu Universidade Nasionál Timor Lorosa’e (UNTL) nian oin ne’e folin, entaun sira mós komesa iha hanoin foun ida oinsá maka atu bele fa’an tan iha fatin seluk para ema bele hola barak tan.
“Primeiru ami lori ba fa’an iha kampus Liceu nia oin, depois ami sente katak dose ne’e folin di’ak entaun komesa loke tan ami nia hanoin hodi ba fa’an tan iha eskola sira seluk tan hanesan iha Eskola Paulos, Eskola Portuguese Dili nomós iha Merkadu liu-liu ba iha eskola ne’ebé maka labarik sira iha baraka ne’e,”nia esplika.
Nia haktuir, liuhosi fa’an dose Corn Dog ne’e bele suporta tan Inan ou Aman sira hodi hola nesesidade baziku uma laran nian no mos bele ajuda familia sira hanesan suporta alin sira ba eskola.
Felicidade mós sente katak media sosiál hanesan Youtube ne’e ajuda loos nia, maske iha deit uma la halo buat ida, maibé haree Youtube nia bele aprende buat foun hosi Youtube ne’e. nia sente halimar media sosial la saugate ida.
“Sasan ne’ebé hau uza halo dose Cron Dog maka Sosis, Trigu no material seluk tan, no orsamentu ne’ebe hodi hola sasa sira ne’e $ 25. Hau sente ida ne’e ajuda tebes ami nia familia no ajuda tebes hau, tanba liuhosi ne’e, hau se bele iha vontade, tanba hau senti katak ita halimar media sosial ne’e lasaugati ida tanba Youtube ne’e bele ajuda ami sira hanesan iha uma de’it ne’e bele halo buat ruma hodi ba fa’an iha fatin seluk hanesan hau halo dose Corn Dog ne’e,’ tenik nia.
Nia salienta Corn Dog ne’e sira fa’an iha eskola sira ne’e, sorti diak bele hetan to’o $50 loron ida, mas iha tempu udan mak labarik sira intervalu mak labele sai hosi eskola iha ida laran no sira nia apa/ama mai foti sira sae ona transporte entaun loron ida bele hetan deit $20 hanesan ne’e.
“Hau nia mensajen ba hau nia feto maluk sira ne’ebé karik ita uza sosial media karik, ita la bele halimar demais Facebook, hodi haree de’it ba ema nia status, hare ba ema nia foto, maibé ba iha Youtube hodi aprende fali ba halo dose ka nonto ba ema suku hena ka buat ne’ebe iha laran, ita bele la’os dehan ita la bele lae, maibe ita mak tenke hakas a’an de’it. Ne’ebe hau husu ba feto maluk sira ne’ebé tur de’it hanesan hau uza imi nia tempu ho di’ak maski imi la bele halo buat seluk mais imi koko to’ok halo hanesan hau halo ne’e,” nia enkoraja nia feto maluk sira.
