Reportajen Umbelina dos Reis
Kongresu RENETIL ba da-VIII, membru juradu, Rui Maria de Araújo “Agil” hato’o nia esperansa ba Kongresu RENETIL katak, dinámika organizasaun hatudu katak vida demokrátika boot tebes, iha kandidatus ne’ebé vontade ho kapasidade iha kompeténsia, atu dirije hodi lori organizasaun ne’e ba dezenvolvimentu sósiu ekonómiku iha rai laran.
Membru RENETIL no hanesan Prezidente da Meza iha Kongresu refere, dehan RENETIL organizasaun apartidária signifika nia la tama iha kestaun polítika partidu nian, maibé hanesan organizasaun, halibur estudante sira iha tempu pasadu no estudante ida agora iha kontextu unidade nasional hodi lori ambiente foun ba dezenvolvimentu.
Nia dehan, aleinde ne’e nu’udar membru RENETIL tenki ajusta aan ba realidade foun ne’ebé mosu be-beik, nune’e bele adapta ho situasaun hirak ne’e hodi lori dezenvolvimentu la’o di’ak iha rai laran.
“RENETIL ida uluk, tinan 34 ba kotuk ne’e diferente ho RENETIL ida agora, RENETIL ida agora ne’e tenki ba prespektiva ne’ebé matenek no badaen hodi lori dezemvolvimentu sósiu ekonómiku iha nasaun Timor-Leste. RENETIL ida uluk nia misaun atu kontribui ba libertasaun pátria, no RENETIL ida agora nia misaun kontribui ba libertasaun povu, maibé espíritu patriotízmo, nasionalízmo no valores hanesan,” dehan membru juradu RENETIL, Rui Maria de Araújo, iha Kongresu loron daruak, iha CCD, Sábadu, 3/12.
Ba Kongresu RENETIL ba da-VIII, loron daruak nian iha Centru Convenção de Díli (CCD), Prezidente da meza ba Kongresu RENETIL, Rui Maria de Araújo hato’o mos katak, Kongresu RENETIL ba Da-VIII nian Primeiru Ezekutivu, Sekretáriu Jerál ho nia Vise sesante sira, aprezenta relatóriu kona ba atividade finanseiru husi tinan 4 ikus nian husi 2018-2022, relatóriu ne’e hetan apresiasaun no aprovasaun hafoin debate konabá tema estratéjika RENETIL nian, durante tinan haat oin mai, orientasaun estratéjika saída mak RENETIL sei iha.
