Reportajen Estajiada Agustinha Amaral
Iha ámbitu selebrasaun dahuluk loron nasionál Tais, foinsa’e milenial Marquita dos Santos, husu komunidade no estadu Timor-Leste prezerva no promove indentidade kulturál Timor nian hanesan tais iha mundu internasionál.
“Nu’udar joven milenial, mezmu ita moris iha era globalizasaun, maibé ita labele haluha ita nia identidade kulturál ne’ebé maka ita nia bei-ala sira husik hela mai ita, entaun atu prezerva no promove indentidade Timor nian hanesan tais iha mundu internasionál, presiza ita nia komunidade no estadu Timor-Leste serbisu tuir konsiénsia individual hodi tulun ita nia Governu halo negosiasaun ho traballadores soru tais sira iha territóriu nasionál,” dehan estudante Marquita dos Santos ba jornalista sira iha CCD, Caicoli, Tersa-feira, 13/12.
Marquita fundamenta, agora da-dauk sira kria grupu kriatividade ida hanaran Domin ba Tais ka Domais, liu husi grupu ida ne’e sira bele fornese formasaun ba sosiedade sira kona ba soru tais, prezerva no promove tais Timor husi munisípiu 13 inklui RAEOA ba nasaun dezenvolvidu sira, nia dehan.
“Agora foin halo lansamentu ba ami nia grupu, maibé ami nia esperansa katak liu husi selebrasaun dahuluk loron nasionál tais, ami sei organizadu hodi hakbesik ba feto maluk sira iha komunidade nia leet, atu adopta sistema soru tais tuir bei-ala sira nia hanorin, atu bele dezenvolve no promove indentidade tais sai hanesan identidade úniku iha nasaun ida ne’e,” Marquita salienta.
Nia hatutan, iha futuru oin mai identidade ida ne’e labele lakon presiza konsiénsia ema hotu nian ho vontade kreativu hodi prodús tais ho di’ak liu tan tuir kultura Timor-Leste nian, tanba ita hetan ona rekoñesimentu husi UNESCO maibé ita Timor seidauk iha lei laboral ne’ebé vigora iha ita nia rai hodi regula produsaun tais sai nu’udar identidade kulturál no istóriku.
Enkuantu, governu Timor-Leste liu husi reuniaun ezekutivu aprova projetu rezolusaun governu, hodi deside loron 14 fulan dezembru nu’udar loron nasionál Tais. Rezolusaun Governu ne’e determina katak loron nasionál Tais sei selebra hanesan ho realizasaun atividade selebratória, rekreativa no informativa ne’ebé iha relasaun ho protesaun ba valorizasaun Tais, nia akresenta.
Aleinde ne’e mos Governu prevé orsamentu $100.000 atu fó apoiu ba grupu kulturál sira ne’ebé fo prioridade liu ba grupu soru Tais. Tanba loron 14 dezembru 2021 Tais hetan nomeasaun sai hanesan patrimóniu mundial Timor-Leste, ne’ebé mak hetan rezistu ona iha UNESCO, iha kapital nasaun Fransa Paris.
