Reportajen Umbelina dos Reis
Sekretária Estadu Formasaun Professional no Empregu (SEFOPE), hamutuk ho Diresaun Nasionál Empregu Exterior (DNEE), realiza serimónia despedida no asina deklarasaun ba joven Timoroan na’in 50 ne’ebé atu ba servisu iha Korea Sul.
Governu liu husi SEFOPE, konvida família no inan-aman traballadór Timoroan na’in 50 asina deklarasaun hodi husik oan ka alin ba servisu iha Korea Sul.
Sekretariu Estadu SEFOPE, Alarico do Rosario husu ba trabalhador sira kumpri nafatin regras ne’ebé mak estabelese iha nasaun Korea Sul, servisu ho profesional no hatudu nafatin étika.
“Iha tinan foun 2023 ida ne’e imi na’in 50 mak sai uluk ba servisu iha Korea, ha’u husu ba imi atu tane aas nafatin ita nia rai RDTL no kumpri lei ne’ebé mak iha ema nia nasaun, ne’ebé imi sai iha ne’e hanesan ema selesionadu, husu imi atu hatudu ezemplu di’ak iha ema nia nasaun hodi ema nafatin fo konfiansa mai ita no lalika sai fali traballador ilegal,” dehan Sekretáriu Estadu Alarico ba traballdor sira, iha Salaun Timor Lodge, Kintal, 12/01.
Governante ne’e hatutan, traballadór Timoroan mate ho asidente hamutuk 13, kauza husi tua lanu no tanba ne’e nia husu ba trabalhador Timoroan sira hotu atu ba servisu iha Korea Sul tenke kuidadu aan no lalika konsumu alkóliku barak liu.
Nia husu ba família traballadór sira atu fo nafatin konfiansa ba traballadór sira hodi ba servisu no husu família sira lalika gasta osan arbiru ba osan ne’ebé sira haruka mai, maibé gasta tuir nesesidade.
“Osan ne’ebé sira haruka mai ne’e gasta tenke tuir nia dalan, osan ne’e tenke halo uma, ita Timor iha kultura maibé halo sukat tanba traballadór sira ba servisu iha ema nia rain ne’e servisu la’os kaman maibé servisu ne’ebé sira halo ne’e todan no fo risku ba sira nia vida” nia dehan.
Fatin hanesan reprezentante Embaixadór Korea Sul iha Timor-Leste, Jooyuo Yang hato’o votus parabéns ba trabalhador na’in 50 ne’e, hanesan ekipa primeiru ba servisu iha Korea iha tina 2023. Nia mos apresia tanba foin primeira vez iha tinan 2022, trabalhador Timoroan na’in rihun ida resin ba servisu iha Korea.
Reprezentante Embaixadór ne’e mos husu ba traballadór sira atu kumpre regra no lei sira ne’ebé mak estabelese hodi Korea nafatin simu Timoroan ba servisu iha Korea no lei Korea fo garantia ba traballadór sira nia saláriu.
“Saláriu ba traballadór sira ho ema Korea hanesan de’it, laiha diferente, ha’u kalkula imi nia salariu truka mai osan dolar besik $1500 kada fulan. Ha’u husu mos ba traballadór sira atu hodi ho imi nia kartaun identidade hodi ba trata imi nia konta bankaria tan agora trata konta bankaria la uza ona pasaporte, hodi mos ho imi nia ropa mahar tan agora klima iha ne’eba malirin los,” informa Jooyuo Yang.
Nia hatutan tan, iha tinan 2020-2021 situasaun pandemia Covid-19 governu Korea la tau atensaun ba traballadór ilegál no iha tinan 2022, Polísia Korea hahú kaptura traballadór na’in 10.000 husi Nasaun Vietnam no Tailándia no traballadór Timoroan hanesan nasaun datolu ne’ebé servisu ilegal barak iha Korea.
Iha fatin hanesan, Diretór Diresaun Nasionál Empregu Exterior, Filomeno Soares hateten, serimónia asina deklarasaun ne’e hanesan konkordánsia ida ne’ebé família traballadór sira halo katak, aseita sira nia família, la’en ka oan atu ba servisu iha Korea Súl, la’os governu mak obriga, hodi nune’e mosu problema ruma karik parte rua iha hotu responsabilidade hodi rezolve.
