Reportajen Umbelina dos Reis
Sekretáriu Estadu Arte Kultura (SEAK), Teofilo Caldas sorumutu ho Primeiru Ministru (PM), Taur Matan Ruak hodi atualiza servisu arte no kultura iha tinan 2022 nian, ba programa kultura no patrimóniu nian ho sub programa 3 no atividade 9, molok implementa programa foun ba 2023.
“Objetivu husi SEAK sorumutu, ami sei implementa tuir programa primeiru trimestre ne’e sei implementa atividade lubuk ida, da-dauk ne’e preparativus ho Diretór, atividade importante mak tenke rekolla relatóriu sira tinan 2022 nian. Relatóriu ne’e relasiona ho orsamentu ne’ebé mak apoiu ba komunidade ne’ebé halo uma-lulik, apoiu ba grupu kulturál, nune’e rekolla tiha relatóriu sira tinan 2022 nian, depois implementa fali orsamentu tinan 2023 nian,” dehan Sekretáriu Estadu, Teofilo Caldas iha Palasiu du Governu, Kinta-feira, 19/01.
Governante ne’e informa katak, atividade seluk mak halo avaliasaun ba dokumentu proposta husi komunidade sira ne’ebé halo uma lulik tinan 2023 nian, ho grupu kulturál hamutuk 200 resin ne’ebé SEAK simu iha tinan 2022, nune presiza halo avaliasaun, hodi verifika hafoin kontratu no apoiu orsamentu.
Programa ba uma-lulik iha tinan 2023 ne’e polítika governu nian, no iha tinan ne’e orsamentu apoiu ba uma-lulik no grupu kulturál iha Timor iha de’it 100 mil ba fulan Janeiru to’o Juñu, kuandu governu foun mai bele propoin orsamentu ratifikativu para kontinua programa orsamentu ba tinan 2023 nian.
“Proposta ne’ebé ami simu tinan 2022 ne’e 200 resin, uma-lulik de’it 185, grupu kulturál hamutuk 80 resin. Ita bele dehan fó $3500 ka $50000 ne’e presiza osan ho montante boot,” dehan Sekretária Estadu SEAK.
