Reportajen Joanina Casamiro
Familia matebian Jose Bernardo de Jesus Soares, ne’ebé maka mate iha sela PNTL Kaikoli, ho haraik a’an husu ba Ministériu Públiku (PM) hodi aselera prosesu justisa ba kazu ne’ebe halakon sira nia oan nia vida iha Sela PNTL Kailoli, tanba to’o agora seidauk iha Justisa ba família matebian nian.
Liuhusi Konferénsia Imprensa, Porta Voz Donato Jóse Maria Pereira haktuir kronolojia akontesimentu katak, Iha 01 Setembru 2022 oras 11.30 iha ekipa PNTL hamutuk ema nain 4 mai halo kapturasaun ba matebian José Bernardo de Jesus Soares iha nia rezidénsia Audian Blok 3 la ho karta Kapturasaun.
“Ami nia oan mane Jose Bernardo de Jesus Soares nia kondisaun saude saudavel, bainhira ekipa PNTL refere kaptura hodi lori ba iha Sela detensaun komandu PNTL kaikoli Dili, foin iha Slsela detensaun PNTL kaikoli Dili oras 6 nia laran , derrepente ami familia simu informasaun iha oras tuku 10 kalan katak ami nia oan mane Jose Bernardo de Jesus Soares Hakotu i’is iha sela laran”, dehan, Porta Voz Donato Jóse Maria Pereira, ba Jornalista sira iha rezidensia Audian Blok 3, sabadu 28/01.
Nia haktuir, iha dia 05 Setembru 2022 dadersan antes lori matebian nia isin ba halot iha Cemiteiru Bekusi Dili, komandu PNTL Dili haruka ekipa PNTL sira deklara katak mate isin bele haloot no mós prosesu sei la’o nafatin. Mais ate agora atu tama tan ba fulan 5 sira haluhan liafuan sira promete mai familia sira, momentu ne’eba sira deklara katak suspeitu membru PNTL nain 9 mak involve iha kazu ne’ebe akontese iha Sela komandu PNTL kaikoli.
“Hafoin iha 16 Janeiru 2023 , ami familia matebian ba iha edifisiu PCIC, hodi buka tuir ami nia oan nia kazu to’o ona iha ne’ebe , maibe parte Polísia Sientífika ba Investigasaun kriminál Timor-Leste, (PCIC) deklara katak fó tan tempu 30 dias, husi ne’e atu dehan deit katak desde fulan Septembru 2022 to’o agora seidauk iha rezultadu, serake rezultadu autopsia mak seidauk kompletu ou prosesu investigasaun ba oknum membru PNTL nain 9 mak seidauk konklui?, ida ne’e signifika katak Autoridade Estadu sira bosok hela ami familia matebian no halimar hela ho Justisa iha rai doben ida ne’e”, nia informa.
Nune’e familia matebian Ho haraik a’an husu ba Ministériu Públiku, tenke aselera prosesu justisa ba kazu ne’ebe halakon José Bernardo nia vida iha sela komandu PNTL Munisipiu Dili, atu nune’e parte familia matebian bele hetan lia los iha tempu badak.
“Hakruk ba Prezidente Republika , Prezidente Parlamentu Nasional, Primeiru Ministru VIII Governu Constituisional, PDHJ. No inklui Sosiadade Civil sira hanesan; ONG Luta Hamutuk , ONG Fundasaun Mahein , AJAR, komnite 12 de Novembro, HAK, Igreja, no Media sira atu nafatin akompanha prosesu ne’e to’o final hodi nune’e familia matebian bele hetan lia los”, Nia husu.
