Reportajen David da Costa
Iha ambitu Komemorasaun loron veteranos ba dala-6, ho tema “Hametin Unidade ba Dezenvolvimentu Nasionál,” Prezidente Parlamentu Nasionál (PPN) Aniceto Longuinhos Guterres Lopes, hateten, iha loron 21 fulan Maiu 2023 sei hasoru eleisaun parlamentár, tanba Partidu polítiku hotu-hotu iha dever morál no polítiku atu asegura paz no estabilidade, no sensibiliza nia militante no simpatizante sira ho hanoin, atitude no komportamentu síviku no responsável.
Nune’e mós iha grupos ka organizasaun sosiál no profisionál sira, iha mós dever tomak atu kontribui ba paz, estabilidade no ba dezenvolvimentu tuir natureza ida-idak nia knaa, Tanba tina ida ne’e tinan politika nian no iha loron 21 Maiu sei tama ba tore iha elisaun parlamentár.
“Iha loron 21 fulan Maiu 2023 ita sei hasoru eleisaun parlamentár, hodi legitima alternansia reprezentasaun povu no lideransa poder ezekutivu ho nia kolaborador sira. Hanesan iha eleisaun hirak liu ba, hatudu katak sidadaun sira halo teste no kontesta rasik sira nia opsaun polítika no diriji mensájen ba lideres polítiku sira no figuras eminente sira kona-bá importánsia komunikasaun ka dialogu, halo konsertasaun polítika, halo korresaun ba komportamentu polítiku hodi serve interese komum, intrese Estadu tomak,” dehan Prezidente Paralamentu Nasionál Aniceto, Iha anbitu Komemorasaun loron veteranos ba dala-6, iha Palásiu Governu, Sexta 3/03.
Tanba ne’e, ema hotu iha responsabilidade atu asegura prosesu molok no depois eleisaun parlamentar ida ne’ebé lao ho dame no hakmatek. Ambienti ida ne’e, ezigi parte hotu-hotu atu hatudu kapasidade no maturidade politika iha linguagein, atitude no komportamentu durante ezersísiu demokratiku ida ne’e.
Nia salienta, Momentu krusiál no desizivu sira hanesan ne’e, povu hein no presiza liu mensájen ne’ebé edukativu, informativu ho programas ne’ebé atu lori moris diak ba povu. Timor oan hotu-hotu tenki konkorda katak, iha ita nia rain, labele iha espasu ba rasizmu, divizionismu, violensia iha formas oioin.
“Pátria no Povo hein ita bele mantein dame no estabilidade, hodi hakat ba eleisaun parlamentar ne’ebé hakmatek, livre no justu, hodi forma governasaun ne’ebé estável, reforsa instituisaun estadu ni’an sira, reforsa kumprimentu lei no orden no lori Timor-Leste ba dezenvolvimentu inklusivu no sustentavel,”hakotu nian.
