Reportajen Silvino Freitas
Bee Timor Leste, Empreza Públiku (BTL.EP) kontrata kompañia Loimali no Tersangsun hodi instala fornesimentu bee mós ba komunidade iha suku 5 iha postu administrativu Atsabe.
Almeida Boavida Jestór Projetu no Estudu Sistema Informasaun Jeografia BTL,Ep hateten, kontratu ne’e halo ho kompañia 2 atu halo servisu ba sistema bee mós, iha postu administrativu Atsabe mak konstrusaun tanki no fornesimentu no instalasaun liner-tanks.
“Iha semana ne’e nia laran ita sei asina tan konstrusaun sistema nian, ne’ebé iha postu Atsabe iha pakote 4, maibé ohin asina uluk 2” dehan Almeida iha edifísiu BTL-EP Kaikoli, (13/03).
Nia dehan tan, kompaña 2 ne’ebé atu halo sistema bee mós maka Liamali sei toma konta ba liner-tanks no Tersangsun sei toma konta ba liña fornesimentu no instalasaun husi bee-matan mai to’o iha komunidade sira ho nia distánsia kuaze 8 kilómetru ba iha suku 5 inklui mós aldeia viziñu balun maka besik ba suku sira ne’e.
“Karik sira abandona projetu hirak ne’e BTL sei haruka sira nia naran ba iha fatin-fatin atu blacklist sira nia naran atu labele hetan tan projetu, hanesan mós ami kuandu halo atrazu ba buat ruma kompañia sei halo multa ba ami, regra iha ona kontratu laran halo tuir de’it ida ne’e” nia esplika.
Tempu hanesan Administradór Postu Administrativu Atsabe, Constancio da Silva hateten impedimentu sei la akontese tanba proposta ne’e sira halo no hein kleur ona ohin maka asina, nune’e komunidade sira iha suku 5 agradese tanba bele hetan ona kompañia ne’ebé bele hahú ona servisu.
“Suku sira ne’ebé atu asesu ba bee mos ne’e maka Parami, Laclo, Malabe, Baboe-kraik ho Tiarlelo ho nia populasaun liu 10.000 sira iha aldeia 24” dehan Constansio hafoin halo kontratu ho kompañia iha BTL Kaikoli.
Entretantu kustu globál ba projetu sistema bee mós iha postu Atsabe ho totál $2,466,465,83.
