Reportajen Silvino Freitas
Sekretáriu Estadu Protesaun Sivíl (SEPS) ho parseiru sira preparadu ona, atu halo mitigasaun ba risku bai-loron naruk ne’ebé sei kontese iha epoka ida ne’e.
Sekretariu Estadu Protesaun Sivil (SPES), Joaquim Martins hateten daudaun ne’e meteorolojia Geofisika anunsia ona katak mundu ohin loron muda ona husi faze La-niña ka udan ho intensidade normál ba fali iha El-niño ka bai-loron naruk, ne’e presiza atensaun tanba iha Timor Leste dezastre ne’e akontese kada tinan tomak, nune’e presiza preparasaun protesaun sivíl nian, atu atende komunidade sira hahú husi aldeia suku mai to’o iha nasionál.
“Ho autoridade protesaun sivil ne’ebé harii tiha ona, ita éspera katak servisu sira ne’ebé iha munisípiu to’o iha baze ne’ebá bele hala’o ho di’ak lalais , konfiansa ne’ebé fo ba protesaun sivíl ho nia membru sira to’o iha baze, ne’ebé sei la servisu mesak maibé sei hamutuk ho parseiru sira hanesan IOM, governo Japaun no seluk tan” dehan SEPS Joaquim iha Bombeiros Comoro, (14/03).
Tuir nia SEPS hamutuk ho nia parseiru sira fokus ona ba antes dezastre akontese preparasaun sira ne’e hahú ona ba mitigasaun, durante ne’e laiha fokus ba dezastre maibe importante liu ne’e maka prepara ita nia an no komunidade sira antes dezastre akontese.
“Preparasaun sira ne’e halo atu hamenus ema lakon vida nian, hamenus mós kustu ba sasan sira no tuir estudu kuandu ita prepara didi’ak nia kustu ne’ebé atu gasta ne’e menus liu” nia dehan.
Nia konklui, preparasaun ba iha munisípiu mak prepara ona stock balun ba munisípiu hotu-hotu prepara pakote 500 kuandu dezastre akontese ita bele ajuda komunidade sira, seluk tan ita eduka nafatin ita nia nia komunidade sira atu bele hasees an husi fatin dezastre sira.
