Reportajen David da Costa
Embaixadór foun Timor-Leste ba Reinu Unidu, João Paulo da Costa Rangel hateten, iha Timor-Leste sidadaun Timor barak maka presiza tebes kampu de traballu, maibé traballu iha Timor laiha, Timoroan barak deside ba servisu iha Reinu Unida Inglaterra, hodi hatutan sira nia moris. Hanesan Embaixadór foun Timor ba Reinu Unidu sei la promote, maibé sei hanesan Embaixadór foun sei ajuda tenta para ajuda Timoroan ne’ebé maka hakarak ba servisu iha Inglaterra.
“Ohin loron ita hotu hatene katak ita nian rain servisu menus uituan, ita nia joven sira presiza duni kampu de traballu hodi hala’o sira nia moris, prioridade sira ne’e tama hotu iha ita nia servisu, maibé ida ne’e sedu liu para atu bele halo kompromisu ruma. Ne’e duni, iha prioridade ita sei haree ba kestaun ida ne’e, maibé primite ha’u labele promete buat ida, maibé Embaixadór sei tenta ajuda ita nia joven sira, ita nia sidadaun sira ne’ebé maka hakarak servisu iha futuru mai,” João dehan ba Jornalista sira, bainhira remata hasoru malu ho PM Taur Matan Ruak, iha Palásiu Governu, Tersa 28/03.
Alende ne’e mós, hanesan Embaixadór foun Timor-Leste iha Renu Unidu, ohin mai enkontru kortejeia ho Primeiru Ministru (PM) Taur Matan Ruak, hodi mai agradese konfiansa ne’ebé mai husi Primeiru Ministru, enome pesoal no Governu fó, tanba ne’e maka mai agradese.
Nune’e mós mai rona orientasaun ruma husi Primeiru Ministru nian, atu bele halo tuir no bele ezekuta bainhira iha ona nasaun Reinu Unidu.
Primeiru Ministru fó de’it mensajen atu servisu hamutuk entidade hotu-hotu, atu oinsá bele melora prestasaun de servisu estadu nian ba sidadaun Timoroan sira ohin loron hela iha nasaun Reinu Unidu ne’e.
Nune’e mós nia dehan, nia rasik mai husi klase traballadór, “Ita boot sira hatene ha’u la’os mai husi elite polítika tanba ne’e maka hetan konfiansa hodi ba ajuda fali ita nia mau alin sira hanesan mós ha’u klase traballadór rasik. Tanba ne’e hau simu desafiu ida ne’e, com todu respeitu, ho dedikasaun tomak para bele apoiu ita nia ekipa ida iha Londres”.
Entertantu Emabixadór foun iha Reinu Unidu sei desloka ba iha Reinu Unida iha fulan Abril tinan ne’e, hodi halo nia servisu durante tinan tolu ou haat.
