Reportajen Silvino Freitas
Partidu Asosiasaun Popular Monarquia Timorense (APMT) bainhira hetan fiar husi povu sei foku ba diversifika seitor agrikultura no peska, hodi redús númeru dezempregu no kria edukasaun ne’ebé dignu ba ema ho defisiénsia sira.
Prezidente Organizasaun Juventude Partidu Manuel da Costa Mesquita hateten, bainhira povu no joven fó fiar ba APMT hodi hetan asentu iha parlamentu no hakat ba governasaun maka aposta prioridade ba joven dezempregu sira liuhusi diversifikasaun ekonomia.
“Partidu politika balun haruka joven sira ba railiur maibé APMT laiha no sei oposta hodi emprega juventude sira hotu iha ita nian rain rasik” Manuel Promete iha Salaun Delta-Nova, (26/04).
Nia dehan tan, diversifikasaun ekonomia importante tebes iha setór agrikultura, agrikultura iha parte ne’ebé importante maka iha raimaran no peska, tanba iha prosesu cadeia de valor nia prosesu ne’e kontinuasaun maka iha kuda, kolleita no prosesa ba merkadu mós presiza ema, nune’e bainhira hetan fiar husi povu sei oposta ba diversifikasaun ekonomia no iha seitor peska nian Timor Leste iha tasi ne’ebé 77 kilómetru kuadradu, durante tinan 20 ukun nain abandona de’it.
“APMT prioritiza tebes atu dezenvolve setór peska no sei intensive, moderniza setór peska halo industria iha Timor Leste nune’e bele esporta ita nia produtu sira ba iha rai li’ur, ida mak ita halo durante tinan 5 bele hamenus númeru dezempregu iha estadu ida ne’e” nia dehan.
Nia konklui katak, APMT mós iha polítika inkluzaun hodi fó edukasaun ne’ebé di’ak ba maluk sira defisiente sira tau sira iha fatin ne’ebé seguru atu aprende, nune’e iha polítika edukasaun APMT sei foku ba setór edukasaun ne’ebé dignu ba ema ho defisiénsia sira.
