Reportajen Silvino Freitas
Komprimísiu polítika partidu Asosiasaun Popular Monarquia Timorense (APMT) nian kona-ba fera foho ramelau, kabalake, matebian no sobu parlamentu nu’udar konseitu politika filozofia ba investimentu seitor turizmu nomós dinamiza kualidade parlamentu nian, hodi kria lei ne’ebé relevánsia ba situasaun sira kontestu Timor Leste nian, la’ós ho intensaun ne’ebé la di’ak.
Prezidente Organizasaun Juventude Partido (OJP) Manuel Mesquita hateten, politika fera foho Ramelau, Matebian no Kabalake ne’e konseitu termu politiku no filozofu, liuhusi debate no dialogu sira APMT klarifika ona katak atu halo investimentu infraestrutura hodi kria kondisaun, iha foho tolu ne’ebé APMT tau prioridade tebes hanesan foho matebian no kabalake foku ba atu dezenvolve seitor turizmu ekolojiku, ambientál no florestál, foho ramelau foku ba turizmu kulturál, ambientál no relijiozu.
“Tenke kria infraestrutura masimu maka estrada tenke aesu ba ne’ebá, guest-house atu bele fo biban ba turista sira ne’ebé hakarak ba vizita tantu turista lokál, nasionál nomós internasionál, durante tinan 20 ema hotu hakarak ba vizita fatin refere mai ita laiha kondisaun, ukun nain sira foku liu ba projetu bo’ot hodi haluha tiha diversifikasun ekonomia ne’ebé esénsia tebes ba futuru nasaun nian” klarifika Manuel, liuhusi konferénsia impresa ne’ebé hala’o iha uma-adat tasi-tolu, (01/05).
Nia mós klarifika kona-ba konseitu sobu parlamentu, APMT aposta katak durante ne’e la’os sai segredu tanba bainhira hetan fi’ar ba parlamentu atu dinamiza parlamentu halo parlamentu ida mais kualidade produz lei ne’ebé kualidade ba interese povu no nasaun nian, labele uza parlamentu hodi asegura poder ba interese grupu nian, maibé povu no nasaun presiza lei ne’ebé di’ak hodi reflete ba dezenvolvimentu, tanba deputadu ne’ebé tu’ur iha parlamentu reprezenta povu nia lian.
Fatin hanesan Vise-sekretária OMP Mariazinha Gusmão klarifika, konseitu husi fera foho ramelau ne’e, atu kria fatin turizmu hodi reduz dezempregu, hanesan loke guest-house, otelária no restaurante nune’e bele hasae produtu lokál iha foho ramelau nian, tanba iha trajedia naturál ne’ebé halakon joven nain 2 nia vida iha ramelau ne’e parte kestaun ida atu bele kria kondisaun di’ak ba fatin relijozu iha ramelau, bainhira ema halo peregrinasaun bele liuhusi dalan ne’ebé seguru.
“APMT tau prioridade ba ne’ebá ho infraestrutura no hakarak aposta orsamentu iha ne’ebá hodi hadi’a eskada sira ba to’o iha Nain Feto nian, hodi evita asidente karik laiha fatin ne’ebé di’ak ita ba halo peregrinasaun joven sira barak bele hetan asidente” nia konklui.
