Reportajen David da Costa
Iha ámbitu kampaña Elitorál ba Eleisaun Parlamentar 2023, Resistência Nasional dos Estudantes de Timor-Leste (RENETIL), husu Ba Povo tomak atu uza kampaña eleitorál ne’e ho di’ak, atu haree partidu politiku sira nia programa, hodi bele hili partidu ida ne’ebé maka reprezenta povu nia aspirasaun.
Iha Komunikadu Imprensa, Sekretáriu Jeral, Resistência Nasional dos Estudantes de Timor-Leste (RENETIL), Joaquim da Fonseca “Russo”, hateten, RENETIL saúda povo no partidu politiku sira ba komportamentu siviku ne’ebe permite semana rua dahuluk kampanye eleitoral la’o iha ambiente ida relativamente pasifiku.
“Ho ida ne’e, RENETIL husu ba Povo tomak atu uza kampanye eleitoral ne’e hanesan oportunidade atu hatene didiak partidu sira nia kapasidade no programa politiku, hodi ikus mai bele hili lolos partidu ida ne’ebe bele reprezenta povu nia aspirasaun sira, no la monu iha aktus provokasaun sira atu halo violencsa,” dehan Sekretáriu Jeral, RENETIL, Joaquim, iha Komunikadu Imprensa, ne’ebé Neon Metin Asesu ohin husi RENETIL, Tersa 2/05.
Nia haktuir, iha semana rua dahuluk kampaña eleitoral, Renetil mós lamenta katak sei iha insidente violensia no provokasaun ba violensia ne’ebe rejista iha fatin balun.
Maibé RENETIL fiar katak ho esforsu husi elementu hotu-hotu hosi sosiedade Timor-Leste nian, eleisaun parlamentar 2023 sei la’o iha ambiente ne’ebé pasifiku, no sai eleisaun ida ne’ebe livre no justu.
Entertantu RENETIL sei hala’o observasaun ba Eleisaun Parlamentar 2023, hahú husi períodu kampaña eleitorál to votasaun no kontajen votus, ho observador na’in-200 resin, ne’ebé naklekar iha territóriu Timor tomak, ho eksepsaun Munisipiu Aileu no RAEOA
