Reportajen Silvino Freitas
Partidu Libertasaun Popular (PLP) nia programa prioridade ba mudansa klimátika, maka hakarak asegura no mobiliza fundu husi doadór no setor privadu sira, hodi hala’o mitigasaun no adaptasaun ne’ebé reziliente ba impaktu no risku mudánsa klimátika maka daudaun ne’e mundu enfrenta.
Prezidente Estudu Estratéjiku Nasionál PLP Pedro Godinho da Costa hateten, programa prioridade PLP nia mak tenke asegura fundu klimátika ne’ebé governu mobiliza tanba Timor Leste nasaun iha hela dezenvolvimento iha hela risku ba dezastre no impaktu ba klimátika ne’ebé dadaun ne’e mundu infrenta.
“Konvensaun mudansa klimátika nian fó oportunidade ba nasaun ki’ik sira hanesan Timor Leste atu asegura fundu sira ne’e, nune’e fundu sira ne’e mai ita halo prioridade ba iha seitor adaptasaun nian” dehan Pedro iha Muzeum da Resistancia Dili, (12/05).
Nia dehan, seitor adaptasaun ne’ebé PLP foka mak bee, agrikultura, saúde, sistema alerta sedu, biodiversidade, infrastructure ne’ebé rejilente no turizmu ne’e importante tebes, iha seitor mitigasaun nian PLP nafatin aposta ba iha diversifika enerjia renovavel, nune’e dadaun ne’e PLP nia governasaun atu hala’o solar panel iha Laleia Manatuto ho kapasidade 72 Mega Hot ne’e maka komitmentu ne’ebé presiza hala’o duni hodi diverisifika energia renovavel.
“PLP mós hakarak investe makaas iha dekorbonizasaun atu ai-horis hodi reduz gas estufa nomós integra ba eskema karbonu internasionál asesu ba iha merkadu karbonu komunidade sira bele faan hetan rendimentu ajuda sira nia nesesidade lorloron hodi ajuda sira mais rejilente ba impaktu no dejastre ne’ebé mosu” Pedro esplika.
Nia dehan tan katak, durante governasaun PLP asegura no mobiliza fundu klimátika verde kuaze osan 55 milloens kapitalizadu ne’e investe ba sistema alerta sedu nivel nasionál dadaun ne’e mak foin implementa projeitu ne’e, hodi asegura sistema alerta sedu ne’ebé di’ak bele rejilente hasoru dezastre durante tinan 5 nia laran sistema ne’e sei estabelese.
“Tuir mai mak mobiliza fundu hala’o mapamentu ba perigu, risku sira no halo polítika ba mudansa klimátika nian hodi asegura dezenvolvimento infrastructura ita hakarak asegura aspetu sira ba jestaun risku klimátika nian, ba seitor hotu nia planeamentu no polítika hodi bele integra dezenvolvimento mais rejilente iha seitor hotu hotu” nia dehan.
Nia esplika, progressu durante governasaun PLP nian maka mobiliza mós fundu karbonu ne’ebé investe husi seitor privadu maka fundu $1000.000 ba fugaun aluminium ne’ebé poupa enerjia no iha tinan ne’e fugaun refere sei to’o iha Timor Leste hodi fahe ba komunidade sira, hodi reduz ai-sunu, taa ai hodi faan no sunu nomós moras ispa ba feto no labarik feto sira, ne’e maka PLP nia programa durante ne’e hala’o ona parseria ho seitor privadu sira.
“Fundu sira ne’e husi seitor privadu ka doadór sira, ne’ebé PLP nia planu programa ne’e labele depende ba orsamentu jerál estadu nian, maibé tenke mobiliza rasik fundu involve seitor privadu sira bele rezolve impaktu mudánsa klimátika” Pedro Konklui.
