Reportajen Silvino Freitas
Estaleiru figueira da foz ne’ebé dadaun hala’o hela industria ba ró Haksolok, Timor Leste mak nain ona ho 95%, nune’e Timor Leste tenke kontente ho investimentu bo’ot ne’ebé sei emprega Timoroan barak nomós sei próduz ró barak, hodi fo lukru bo’ot no imajen di’ak ba Timor Leste.
Deputadu Parlamentu Nasionál husi bankada FRETILIN, Antonino Bianco hateten, estaleiru navais Figueira da Foz dadaun ne’e 95% Timor Leste maka nain, hodi transforma industria bo’ot halo investimentu hodi fó servisu ba Timoróan no mós fo lukru ba estadu Timor Leste, tanba ne’e tenke kontente ho investimentu bo’ot ne’ebé hamorin mós imajen Timor Leste nian.
“Ita atu transforma buat ne’e sai investimentu la’ós kestaun maka ró Haksolok, industria bo’ot ne’e sai fali ita nian ona ne’e la’ós ró haksolok de’it mak halo ne’ebá maibé iha ró barak-barak, estaleiru ne’e nain mak ita ona, signifika sei fó lukru bo’ot ba ita no imajen di’ak Timor Leste nian, labele haksesuk malu fali ró haksolok, sai tiha ita nian hodi fo biban ba ema hodi servisu no sai mos sentru formasaun ba Timoróan” dehan Bianco iha sede bankada FRETILIN, (15/05).
Nia dehan, labele haksesuk malu de’it maka ró Haksolok, tanba nee ró ki’ikoan, karik ita hakarak halo tan ró no hadia ró barak husi ema seluk nian, estaleiru ne’e bele rezolve liu ró Haksolok, no ró barak mak sei mosu iha estaleiru refere sei halo ró barak ba Timor Leste no nasaun seluk.
“Ita agora prepara kuandu ami ukun halo kontinuasaun ba Timoroan sira ba tan, atu prepara no treinu hodi servisu iha ne’ebá no bele mós halo estaleiru iha Timor Leste, ita tenke kontente tanba ne’e la’ós buat ki’ik maibé ita halo investimentu iha ita nia rain, ita bele rezolve buat ne’ebé ema hanoin próblema” nia dehan.
Nia esplika tan, tuir informasaun no dadus ne’ebé iha katak Timoroan ne’ebé ba mosu problema iha Portugal balun ba servisu ona iha estaleiru ne’ebé dadaun nee Timor Leste mak sai nain, tanba ne’e bainhira ukun ho fazeadamente Timoroan tenke ba hodi aprende, la’ós ba hodi servisu de’it iha estaleiru ne’e maibé presiza haruka Timoroan ho fazeadamente ba servisu iha estaleiru refere, prósesu rekrutamentu ne’e la’ós hanesan SEFOPE nian maibé bele haruka estudante sira husi universidade sira ne’ebé iha ligasaun ho industria halo ró nian, tanba ne’e iha investimentu ne’ebé boot, Timoroan ne’ebé dadaun ne’e servisu iha estaleiru ne’e mak sira ne’ebé hela iha ne’ebé no balun sei haruka husi Timor Leste.
