Reportajen Joselina dos Santos
Partido Congresso Nacional de Reconstrução de Timor (CNRT), ezije ba Komisaun Nasional Elisoens (CNE) no Polisia Nasional Timor-Leste (PNTL) atu kontrola ho maximu ba Partidu Politikus sira ne’ebé la kumpri regras kampaña elitorál no tenki foti medidas ne’ebé seriu no rigorosas, liuhosi prosesu penal nesesariu, atu kontrola atitude irregular no antidemokratiku kometida husi partidu politiku sira.
Liuhosi Konferesnia Imprensa, Porta Voz Partidu CNRT Roberto Soares hateten, hahú kedas husi inisiu periodu kampaña eleitóral, Partidu CNRT sempre halo konferensia imprensa hodi relata no atualiza ba publiku insidentes no iregulariedades ne’ebé akontese iha nível aldeia, suku, postu no munisipiu, ne’ebé kometidu husi parte partidu adversariu sira.
“Husi relatus hirak ne’ebé fó sai ba publiku, sempre aneksa mós ho provas no evidensias ba akontesimentu hirak ne’e. Maibé husi parte autoriedade sira, tantu CNE nune’e mós polisia seguransa publika la fó reasaun seriu no exemplar hodi kontinua husik asaun irregular sira ne akontese”, dehan, Porta Voz Roberto Soares, Liuhosi Konferensia Imprensa iha Salaun Sede CNRT, Bairro dos Grilhos, tersa 16/05.
Tanba ne’e Partidu CNRT lamenta tebes ba posisaun imparcialidade ka la iha reasaun husi CNE ho PNTL sira durante atuasaun hasoru krime elitorál no krime pekulatu kometidu, hanesan partidu sira ne’ebé kontinua uza kareta Estadu durante periodu kampaña hodi fahe hela sasan ba populasaun sira ho objetivu hodi kasa no sosa sira nia votos, hahalok ne’ebé kontra tebes lei kampaña elitorál.
“Ami lamenta tebes ho kumprimentu ba orariu kampaña eleitóral husi partidu boot balun, tanba tuir lei kampaña elitorál, oras remata kampaña define iha oras 18h30m, maibé Governu ne’ebé lidera husi plataforma maioria loke hela exposisaun iha fatin hotu iha kapital Dili, hanesan ex porto Dili, Metinaro nomós Kristo Rei hodi konsentra populasaun sira ho intensaun politika ba kampaña elitorál,” sira lamenta.
Nia dehan, tuir lei kampaña elitorál bainhira iha kampaña iha munisipiu ida, komisiu nasional no mini-kampaña sira tenki hapara atu evita violensia entre militantes no apoiantes sira, maibé CNE ho PNTL ho unanimidade aprova atividades ho tipu hotu ne’ebé mensiona iha leten, hodi realiza dala ida deit iha kapital Dili, ne’ebé signifika autoriedade siguransa no CNE tenki garente servisu tomak ho maximu dedikasaun hodi proteze sidadaun hotu husi risku ba provokasaun atu hamósu konflitu.
“Ami husu ba CNE ho autoriedade Siguransa sira atu asumi responsabilidade durante kampaña iha loron 18, fulan maiu, nu’udar loron ikus liu ba kampaña Partidu CNRT nian iha Kapitak Dili. Husu mós ba militantes, simpatizantes no apoiantes sira atu nafatin komporta tuir lei no ordem hodi labele reaje ba provokasaun husi parte ne’ebé deit atu nune’e nafatin tau as prinsipiu demokrasia no defeza ba ita nia Estadu Direitu Demokratiku iha ita nia rain”,
Partidu CNRT husu ba povu eleitoradu sira bainhira induvidu ka entidade governamental ruma tun ba entrega sasan ka osan ruma ho intensaun atu vota ba sira nia partidu, “ita boot sira imediatamente hato’o kedas keixa ba PNTL no CNE atu sira halao kedas atuasaun hodi prende induvidu ka grupu refere, no hafoin detensaun PNTL tenki fo kedas segimentu ba Ministeriu Publiku, tanba ne konsidera nudar krime eleitóral”.
