Reportajen Umbelina dos Reis
Prezidente Comissão Nacional das Eleições (CNE), José Agostinho Belo hatan ba kestaun debate públiku entre Partidu Polítiku iha eleisaun lejizlativa 2023, ne’ebé menus envolvimentu feto katak CNE fó duni oportunidade ba juventude feto hosi partdu hodi ko’alia, maibé CNE mós labele tama to’o sira nia situasaun internal, maibé normalmente sira nia komitmentu, estatutu no oportunidade igual ba feto no mane.
Nia dehan, horisehik mak feto na’in ida debate iha oin hosi Partidu FRETILIN, hori bainrua feto laiha, no pratikamente loron ikus mós feto la tuir debate. Sente la’os triste maibé konseitu jéneru prioridade ba feto labele iha de’it partidu no kampaña nia laran, maibé presiza ona implementa iha situasaun debate sira hanesan ne’e, hodi nune’e públiku bele haree katak sira nia kometimentu oinsá atu promove feto ba futuru.
“Iha mudansa dinámika duni iha debate ne’e, mas ba oin ita esforsu nafatin nune’e feto tenke kontribui ba debate i perguntas ne’e mai hosi sosiedade, akadémiku, PDHJ, inklui instituisaun ne’ebé durante ne’e haforsa liu ba defeza seguransa, justisa, estatistika, ekonomista, agrikultura no inklui sidadaun poténsial,” dehan Prezidente CNE, iha debate entre Partidu Polítiku sira iha Salaun Mahoka, Hudi-Laran, Dili, 18/05.
Nia hatutan, iha momentu ne’ebá CNE hakerek karta ne’e ba líderansa partidu polítiku, maibé depende ba despaxu ne’ebé iha, maibé partidu hotu-hotu ko’alia konaba prioridade envolvementu feto iha situasaun hirak ne’e. Tanba ne’e mak iha momentu ne’eba debate konaba juventude feto no mane nia direitu hanesan, maibé espesial prioridade ba feto ketak, se lae haruka mai debate ne’e mane de’it, i realidade kualidade Timor nian mak nune’e ona.
Entretantu hosi debate ne’e, Prezidente Jose Belo espera sidadaun Timor-oan akompaña debate liu hosi kanal RTTL no mídia sosial sira, muda ona sira nia hanoin, karik iha momentu ne’eba seidauk deside sira nia votus atu fó ba se karik, sira akompaña debate ne’e ohin postura ona partidu polítiku hosi númeru 1-17 ne’e mak espektativa hosi CNE nia oferese.
Nune’e ba partidu polítika sira ne’ebé ukun ona, karik sira nia programa balu ne’ebé seidauk realiza bele klarifika ba povu sira no ba partidu foun sira bele ko’alia ho livre. Nia husu mos ba partidu ida ne’ebé mak povu fó fiar ukun karik tenki realiza duni programa ne’ebé sira promete.
Eventu refere kustu ne’e CNE servisu hamutuk ho RTTL, Fasildade salaun Mahoka laran di’ak fó apoiu gratuita.Debate agora ne’e ba dala-9 maibé ho kustu ki’ik, hosi parte CNE hasai kustu por volta 50 mil. Maibé parte hosi RTTL seidauk hatene.Maibé debate ida uluk eleisaun parlametár dala ida de’it maibé kustu boot.
