Reportajen Umbelina dos Reis
Prezidente da Repúblika, Dr. José Ramos Horta liu hosi nia diskursu enseramentu debate entre partidu polítiku sira iha salaun Mahoka hatete nia observasaun durante kampaña eleitoral até agora la’o di’ak tebes, no nia fó parabéns ba partidu hotu-hotu ba ida-idak nia komportamentu ne’ebé kontribui ba dame, maske iha insidente balu. Nia apresia mos ba orgaun seguransa no orgaun eleitoral ne’ebé kontribui husi kampaña inísiu to’o remata hala’o knaar ho profisional no seriedade.
“Ha’u rasik hateten ba observador sira nível partidu polítiku, nivel lideransa, ha’u la rona buat ruma hosi líder partidu sira konaba provoka violénsia nian, i insidente ida ka rua, ha’u la hateten katak ne’e normal mas ne’e akontese tanba ema barak envolve i difísil tebes atu sai perfeitu.” Dehan Prezidente Horta iha nia diskursu iha Salaun Mahoka, Hudi-Laran, Kinta-feira, 18/05.
Prezidente Ramos Horta, fo parabéns ba autoridade seguransa PNTL, F-FDTL sira ne’ebé marka prejensa iha teritóriu Timor laran tomak ne’ebé servisu ho profesional no imparsialidade hodi hala’o seguransa di’ak tebes.
“Parabéns ba imi ohin ne’e, loron 22-23 de Maiu kontinua parabéns ba imi. Fiar ke buat hotu sei la’o ho di’ak maske dezafiu boot iha kampaña nia laran, parabéns mós ba CNE no STAE maske imi hetan dezafiu boot mais prezidente fó tempu apertadu ba imi simu dezafiu ne’e ho seriedade.”
