Reportajen Silvino Freitas
Lei ba reforma pensaun idade efetiva servisu iha funsaun públika atu fo biban ba Komisaun Funsaun Públika (KFP) hodi aplika ba funsionáriu sira ne’ebé tama ona ba idade reforma, hetan kaduka tanba ne’e presiza hahú ho inisiu lejislasaun foun husi governu foun atu hetan aprovasaun iha parlamentu nasionál.
Komisáriu KFP Faustino Cardoso hateten, to’o dadaun ne’e ita seida’uk iha lei ne’ebé obriga tama reforma kuandu tama ona ba idade 60 ba leten no proposta ba dekretu lei hodi regula lei ba servisu efetivu iha funsaun públika ne’e iha ona no tama ona ba lista legislative ne’ebé oitavo governo buka atu hala’o diskusaun hodi hetan aprovasaun, maibé infelizmente molok eleisaun ajenda diskusaun kona-ba difinisaun reforma pensaun idade efetiva servisu iha funsaun públika ajenda ne’e suspende tiha.
“Ne’ebé ita hein governo foun mai sei sai asuntu urjente no prioridade as maski ho prosesu foun tanba atu tama ba ne’ebá sei iha prosesu naruk tenke husu autorizasaun legislative husi parlamentu nasionál, maibé kuandu governu ida ba ona entaun lei ne’e kaduka ona la validu ona, tanba ne’e atu hahú tenke hahú husi inisiu fali hodi lori fali ba iha parlamentu hodi hetan aprovasaun” dehan Faustino iha parlamentu nasionál, (06/06).
Nia dehan tan katak, tanba ne’e ita nafatin akompaña hodi servisu hamutuk hodi kestaun reforma ne’e sai prioridade hodi nune’e bele fo biban ba funsionáriu públiku sira inklui sira ne’ebé tama ona ba kategoria professor sira ne’e, atu labele hasusar an hodi kontinua servisu, maskí tama ona idade reforma no saúde mós la permiti ona nomós iha ona presaun sosiál husi família, tanba idade media ba funsionáriu sira maka ba feto ne’e 44 anos no ba mane ne’e 47 anos.
