Reportajen Zevonia Vieira
Komandante Jerál Polisia Nasional Timor-Leste, Henrique da Costa no Segundu Komandante Jeral, Komisáriu Pedro Belo, halo enkontru ho Resistência Nacional dos Estudantes de Timor-Leste (RENETIL), hodi husu hanoin sira ne’ebe bele tulun PNTL hodi hala’o serbisu ne’ebe diak liután ba nasaun no sosiedade.
Liuhusi entrevista ho jornalista sira, Sekretariu Jeral RENETIL, Joaquim Fonseca hateten RENETIL nu’udar organizasaun rezisténsia halo enkontru ho instituisaun ne’ebe importante tebes konaba seguransa, lei no ordem, liuhusi enkontru nee instituisaun PNTL mai espresa sra nia abertura ho neon o atetudi ne’ebe nakloke, oinsá serbisu ho sosiedade tomak inklui RENETIL.
“Ami mos hato’o ami nia apresiasaun ba PNTL nia serbisu em jerál, agradese no kongratula PNTL nia serbisu ne’ebe garante, katak prosesu eleitorál hahú husi kampaña to’o kontajen de votus lao ho diak ho insidentes mínimu, fo korajen ba membru PNTL tomak, atu uza serbisu ida ne’e hanesan padraun ida hodi hakat ba oin. Hein katak ida ne’e laos sorumutu ida ikus liu. ba oin kontinua halo kooperasaun ida ne’e ba hadia ita nia rai Timor no sosiedade”, dehan SekJen RENETIL, 13/07
Ba Neon Metin Sekjen RENETIL haforsa liután katak, PNTL nakloke atu rona hansoin sira mai husi RENETIL, sekarik iha buat ruma presiza atu hadia iha PNTL laran RENETIL sei kontribui hodi fo hanoin.
Iha fatin hanesan Komandante Jeral PNTL, dehan PNTL halo vizita kortezia ba RENETIL, hodi husu nafatin tau matan ba PNTL ninian serbisu, fo sira nia kontribuisaun liuhusi aspetu saida deit.
“Kuandu PNTL halo la los no la diak, tenke hateten ba ami katak ita boot sira halo ne’e la diak, nune ami bele hadia, atu dezenvolve polisia ne’e laos depende deit ba ami nain 4000 ne’ebe iha polisia nia laran, maibé presiza kontribuisaun husi ema hotu. Ami husu apoiu husi parte RENETIL nian para nafatin fo hanoin ba PNTL”, dehan Komandante Jeral PNTL, iha sede RENETIL
Relasiona ho situasaun rai laran, Komandante Henrique konklui katak situasaun seguransa iha rai laran lao hakmatek, nune’e husu nafatin ema hotu nia kontribuisaun, hodi bele mantein situasaun ne’e ho diak.
