Reportajen Umbelina dos Reis
Iha lansamentu livru ambiental no saúde aliña mós ho Timor-Leste ne’ebé adopta ona Objetivu Dezenvolvimentu Sustentável (ODS) iha sétor ambiental no saúde bázika hodi asegura ema hotu nia moris, nune’e liu hosi livru hirak ne’e bele enkoraja estudante pré-primaria no sosiedade bele iha koñesimentu no konsiénsia ba ambiente.
Diretor Mary Mackillop Today (MMT), Alipio Baltizar hateten, lansamentu livru ohin ho tema “investimentu edukasaun liu husi livru ambiental no saúde báziku hodi asegura moris seguru ba ema hotu.” Nia dehan meiu ambiental no saúde báziku ne’e mehi atu dezenvolve hodi responde ba nesesidade iha prosesu aprendizajem ne’ebé ligadu ho siénsia naturais tuir kurikulun nasionál ba ensinu báziku.
“Ita hatene asuntu ambiental no saúde báziku ne’e problema seriu iha sosiedade, tanba dala barak ema soe fo’er arbiru de’it bele prezudika ba ema nia saúde, no konsiénsia sei limitasaun, nune’e asuntu ambiental no saúde sai preokupasaun global ne’ebé mak nasaun unidas rasik deklara nia asuntu ne’ebé importante liu husi deklarasaun ba iha objetivu dezenvolvimentu sustentavel (ODS) hanesan mós meius ida atu asegura ambiental no saúde ne’ebé sustentavel ba nasaun iha mundu, inklui Timor-Leste mos adopta ODS iha dezenvolvimentu seitor ambiental no saúde.” Dehan Diretor MMT, Alipio Baltizar, iha nia diskursu lansamentu livru iha salaun Mahoka, kinta-feira 20/07.
Nia hatutan, liu hosi instituisaun governu, ajensia nasoens unidas no NGO hotu halo kampaña no advokasia ba asuntu refere la’o makas tebes iha mundu inklui Timor-Leste, maibé kada tinan ita nia planeta mundu ne’e hetan lixu besik biliaun rua husi fontes global estatístika iha fulan Marsu tinan 2023, no mós kada loron iha mundu ne’e ema produz ka soe lixu arbiru besik 4 millaun tonelada, hosi fontes plastiku nasional jeografia, Timor-Leste produz ka soe foer arbiru kuaze tonelada 70 iha Timor laran tuir fontes urbana lines ONG.
“Soe lixu arbiru ne’e fo impaktu ba ambiente no ema nia saúde, bazeia ba situasaun no kestaun ne’ebé hakarak dezenvolve seitor, entaun liu hosi lansamentu livru foun sira ne’e bele investe sedu ba labarik no estudante sira, nune’e hasa’e konsiésia hodi kuidadu no hadomi ambiente hodi bele asegura moris no seguru ba ema nia vida”. Nia informa.
Ambiente no saúde báziku tenki hetan atensaun sériu hosi komponente hotu iha nasaun, partikularmente ba estudante ne’ebé investe hosi eskola no sosiedade, bazeia ba jestaun dezenvolve hakerek livru istóriku sira ne’e tulun estudante hodi promove ambiente nomos saúde báziku.
Iha fatin hanesan Prezidente Casa Sivil Sejuina Maria Lopes, hateten, lansamentu ba livru ambiental no saúde báziku ne’e importante tebes hodi oferese livru ba labarik sira iha pre-eskolar nune’e bele koñese kona-ba ambiente no mós saúde públiku.
“Prezidente Repúblika (PR) Jose Manuel Ramos Horta nia programa ne’e di’ak tebes hodi tulun no fó atensaun ba edukasaun labarik sira pre-eskolar no mós eskola sekundária hodi promove kultura literasia, oinsá labarik sira bele hatoman aan lee livru hosi idade inosente.” dehan Prezidente Casa Sivil Sejuina Maria Lopes, ba Jornalista sira, iha salaun Mahoka.
Nia konklui, Prezidente Repúblika (PR) iha vizaun importante ba iha area saúde infantil nutrisaun ba inan isin-rua sira, edukasaun save importante tebes hodi halo advokasia ho governu, nune’e bele tulun labarik sira nia futuru.
