Reportajen Agustinha Amaral
Sekretáriu Estadu Formasaun Profisional no Empregu (SEFOPE) servisu hamutuk ho Embaxada Korea Sul distribui livru 2000 ba sentru formasaun lian Korea 26 (rua nulu resin neen) iha Timor-Leste ho objetivu tulun sentru formasaun sira ba formasaun lian Korea nian.
Sekretariu Estadu Formasaun Profisional no Empregu, Rogerio Araujo Mendonça hatete, ohin loron hamutuk ho Embaixador Korea nian iha fatin ne’e atu distribui livru ba sentru formasaun sira ne’ebe fo formasaun lian Korea ba kada sentru formasaun iha Timor no livru ne’ebe distribui hamutuk 26.
“Konteudu husi livru ne’e ka’olia liu konaba lian Korea, atu asesu ba formasaun hodi asesu mos ba iha kampu servisu iha rai li’ur, signifika iha mós lian Tetun no mos lian Korea ho kuantidade hamutuk 2000, divide ba iha sentru formasaun 26, ne’e iha 77 kada sentru” dehan, Sekretáriu Estadu SEFOPE Rogerio Araujo Mendonca ba jornalista iha Eskola Sekundária STM Bekora, Dili, 02/08.
Governante ne’e hatutan, politíka governu nian kada tinan sempre identifika sentru formasaun ne’ebe iha kapasidade hodi bele fo formasaun ba joventude sira, entaun presiza apoiu atu nune’e bele hakbiit joven sira nia koñesimentu, tanba iha ona sentru formasaun 8 ne’ebe kualifikadu tuir estandarizmu INDIMO nian husi level I to’o level IV, maibé sira seluk sei iha hela prosesu INDIMO.
“Mezmu sentru formasaun balu ne’ebe seidauk hetan akreditasaun, laiha problema importante mak joven ne’e tenki hatene duni lian Koreanu nian. Bainhira sentru formasaun iha kada fatin presiza konvoka reuniaun ida, atu identifika sentru formasaun ne’ebe hasoru problema atu tinan oin bele uza maneira hodi apoiu.”
Iha fatin hanesan, Diretor Ezekutivu Sentru Formasaun Ai-Lok Laran, Raul Varela hatutan, livro ne’e hanesan anglu báziku ida karik foin hahu husi dasar nian seidauk tama ba level 1 ho level 2 nian, maibe foin koñese letra Korea. Livru ne’e sei ajuda tanba iha tinan kotuk livru laiha maibé iha fulan haat nia laran tuur hamutuk iha SEFOPE Becora nia nian hodi ko’alia konaba sira-nia problema livru nian, ne’ebe durante ne’e sentru formasaun hasoru.
“Agradese ba Sekretáriu Estadu SEFOPE no Enbaxada Korea nian, tanba apoiu ona livru iha ona Timor laran. Ha’u nia sentru lian Korea iha nasional, tama ona ba prosesu akraditasaun, estudante total 400 feto, mane”, nia informa.
